E’atekaaf ka bayaan

34383989_1284877101646811_344354504809906176_n

E’atekaaf ka bayaan :

Hazrat Abdullāh ibn Umar radiy-Allāhu ta’ala anhu se riwaayat hai ki :
Huzoor Rasool-Allāh sallallāhu alaihi wa sallam Ramazaan ke aakhri ashre me E’atekaaf karte the.

(Sahih Bukhari, Hadeeṡ -2025)

Hadeeṡe Nabawi :

Huzoor Rasool-Allāh sallallāhu alaihi wa sallam ne irshaad farmaaya :
(1) Jis shakhs ne eimaan ke saath ṡawaab haasil karne ki niyyat se E’atekaaf kiya us ke pichhle gunaah bakhsh diye jaayenge.
(Jaam e Sagheer)

(2) E’atekaaf karne waala gunaaho se mehfooz (paak) ho jaata hai.
(Mishkaat ul Masabeeh, Zujajat ul Masabeeh)

(3) Jis ne Ramazaan-ul-mubarak me 10 din ka E’atekaaf kiya wo 2 Hajj aur 2 Umrah ka ṡawaab paayega.
(Sho’ab-ul-Eimaan, Jild -3, Safa -425;
At-Targheeb wat-Tarheeb, Jild -2, Safa -96)

(4) Mo’atakif (e’atekaaf karne waala) gunaaho se bhi ruka rehta hai aur us ko har qism ki nekiya ka ajr o ṡawaab milta hai.

(Ibne Majah)

(5) Ummul momineen Hazrate Aa’isha Siddeeqa radiy-Allāhu ta’ala anhu se riwaayat hai ki :
‘Mo’atakif (E’atekaaf karne waala)ke liye Sunnat ye hai ki wo na mareez ki Ayaadat ko jaaye, Na Janaaze me haazir ho, Na Aurat ko haath lagaaye aur na us se Mubaashirat kare, Aur na kisi Haajat ke liye jaaye, Magar (sirf) us haajat ke liye jaa sakta hai jo zaroori ho. Aur E’atekaaf baghair Roza ke nahi hoga, Aur E’atekaaf Jamaat waali Masjid me kare.’

(Abu Daawūd, Jild -2, Kitaab-us-Siyaam, Safa -492, Hadeeṡ -1172)

*****************
 E’atekaaf ka ma’ana hai ALLĀH ta’ala ki Ibaadat ki niyyat se Zikr e ilāhi ke liye Masjid me thehrna.

*****************
 E’atekaaf ki 3 qisme hain :

(1) Waajib :
E’atekaaf e Nazr – Mannat ka E’atekaaf.
Agar kisi ne Mannat maani ke fulan kaam pura ho jaega to 1 ya 2 din ka E’atekaaf karunga to kaam pura hone par E’atekaaf karna Waajib hai aur usko pura karna zaroori hai.
E’atekaaf e waajib ke liye Roza shart hai, Bagair roze ke E’atekaaf sahi nahi.

(2) Sunnat e Mo’aqqidah :
E’atekaaf e Ashar e aakhirah e Maah e Ramazaan – Ramazaan ka pura Ashar e aakhirah (aakhri 10 din).
Ya’ni 20wi Ramazaan ko sooraj doobte waqt E’atekaaf ki niyyat ke saath masjid me maujood ho aur 29wi ko chand hone ke baad ya 30wi ko sooraj doobne ke baad nikle.
Agar 20wi taarikh ko baad namaaz e maghrib E’atekaaf ki niyyat ki to Sunnat e mo’qaaidah ada na hogi.
Ye E’atekaaf e Sunnat e Mo’aqqidah Kifaaya hai ya’ni agar sab log chhod den to tamaam gunaahgar aur agar ek ne bhi kar liya to sab chhut jaayenge.
Is E’atekaaf me bhi Roza shart hai, magar Ramazaan ke roze hi kaafi hai.

(3) Mustahab :
E’atekaaf ki niyyat ke saath masjid me jaakar thehrna, chaahe thodi der ke liye hi masjid me rehkar chala aaye.
Jab baahar chala aayega to E’atekaaf khatm ho jaayega.
Is ke liye Roza shart nahi.

*****************
E’atekaaf ek muta’alliq chand khaas baaten :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Mard ko E’atekaaf ke liye Masjid me rehna zaroori hai aur Aurat Masjid e Bait ya’ni apne ghar me jo jagah us ne namaaz ke liye muqarrar ki ho us jagah me e’atekaaf kare.
Aurat ko Masjid me E’atekaaf karna makrooh hai, wo Masjid e bait me hi e’atekaaf kare.
Aurat ke liye ye Mustahab bhi hai ke ghar me Namaaz padhne ke liye koi jagah Muqarrar kar le aur us jagah ko paak o saaf rakhe.

(2) Mo’atkif (E’atekaaf karne waala) raat o din masjid me hi rahe wahin khaaye, piye, soye. In kaamo ke liye masjid se baahar hoga to e’atekaaf toot jaayega.

Mo’atkif ke siwa kisi aur ko masjid em khaane-peene ya sone ki ijaazat nahi.
Agar ye kaam karna chaahe to E’atekaaf ki niyyat karke masjid me jaaye aur namaaz padhe ya zikr e ilāhi kare phir ye kaam kar sakta hai. Magar khaane pine me ye ehtiyaat laazim hai ke Masjid Aalooda na ho.

 Behtar hai ke har baar Masjid ke andar daakhil hote hi E’atekaaf ki Niyyat kar len :
Nawaytu Sunnatal E’atekaaf.
Maine (ALLĀH ta’ala ke liye) E’atekaaf e mustahab ki niyyat ki.

Ye niyyat karne ke baad jitni der tak Masjid me rahega E’atekaaf ka Sawaab paayega.

(3) Mo’atkif ko bagair uzr masjid se nikalna haraam hai.
Agar masjid se nikla to e’atekaaf toot jaayega chaahe bhulkar hi nikla ho jab bhi.
Isi tarah aurat apne e’atekaaf ki jagah se nikli to e’atekaaf jaata raha chaahe ghar hi me rahe.

Masjid se nikalne ke 2 uzr hai : (1) Tabai aur (2) Sharai.
Tabai uzr ye hai ki jaise pakhaana, paishaab, istinja, farz ghusl, wuzu (jab ki ghusl o wuzu ki jagah masjid me na bani ho ya masjid me bada hauz na ho)
Sharai uzr ye hai ki jaise Eid ya jum’aa ki namaaz ke liye jaana ya agar e’atekaaf wali masjid me jama’at na hoti ho to jama’at ke liye bhi ja sakta hai.
In uzro ke siwa kisi aur wajah se agar thodi der ke liye bhi e’atekaaf ki jagah se baahar aayega to e’atekaaf jaata rahega agarche bhulkar hi jaaye.

(4) Ramazaan ke E’atekaaf ke liye Roza Shart hai.
Agar kisi ne roza na rakha aur E’atekaaf kiya to Sunnat ada na hoga.

(5) Mu’atakif ko buri ya behuda guftagu karne se parhez karna zaroori hai.
Magar Sukoot karna (khaamosh hi rehna) makrooh hai. Mu’atakif na chup rahe na bin zaroori baat kare. Balke Tilaawat e Qur’an aur Zikr o Durood ki kasrat kare, Ambiya wa Auliya aur buzurgaan e deen wa saaleheen ke haalaat padhe, Ilm e deen ka dars wa tadrees kare, Deeni baaten likhe.

(6) Mo’atakif ko apni ya apne pariwaar ki zaroorat se masjid me kharidna ya bechna jaaiz hai jab ke wo cheez masjid me na ho ya masjid me ho to thodi ho ke jagah gher na le.
Aur agar kharid o farokht tijaarat ki niyyat se ho to na-jaa’iz hai, chaahe wo cheez masjid me na ho jab bhi.

(7) Agar dusra koi madad karne waala na ho to Mu’atakif aurat apne pariwaar ki zimmedaari ada karne ke liye ya’ni khaana pakaane ke liye ya khilaane ke liye ya dusre kaam ke liye E’atekaaf ki jagah se baahar aa sakti hai.

Yunhi agar koi dusra haazir na ho to ghar me aane wale mehmaan ko jawaab dene ke liye baahar aa sakti hai. Aur ghar ki aurten aur mehram ke saamne aane se bhi E’atekaaf nahi tootega.

(8) Nafl (mustahab) e’atekaaf tod diya to us ki qaza nahi.
Agar Sunnat e Mo’aqqidah e’atekaaf toda jis din toda sirf us ek din ki qaza kare, pure 10 dino ki qaza waajib nahi.
Mannat ka e’atekaaf toda to agar kisi muqarrar mahine ki mannat thi to baaqi dino ki qaza kare warna agar aliyul ittesaal waajib hua tha to sire se phir se e’atekaaf kare aur agar aliyul ittesaal waajib na tha to baaqi ka e’atekaaf kare.

(9) (Waajib ya Sunnat e Mo’aqqidah) E’atekaaf kisi wajah se bhi toote chaahe qasdan ya bila qasd baharhaal qaza waajib hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur aur tamaam Auliya Allāh aur Ahle bait aur Ashaba ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Maah e Ramazaan ki ta’azeem karne ki aur is me zyada ibaadat karne ki aur sahi tareeqe se E’atekaaf karne ki aur is ke foyuz o barkaat haasil karne ki taufiq ata farmae.
Aur in baato ko yaad rakhkar amal karne ki aur dusro ko bataane ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.