Ahle Bayt e Atthar aur Mannat ke Roze!

Ahle Bayt e Atthar aur Mannat ke Roze!

Quran ki 76 Surat Surah Insan/Dahar, Nazil he hui Panjatan Pak ki Shaan duniya ko bataane keliye! Shaan-e-Nuzool ki short background ye hai ke ek bar Shehzade Hasnain Kareemain Alaihi-Mussalam beemar hogaye, to Aaqa SallAllahu Alaihi wa Aalihi wa Sallam ne Sayyeda-e-Kainat aur Maula Ali ul Murtaza se farmaya ke Hasnain ki Shifayabi keliye Nazr karo yaani mannat maano. To Aapne Nazr maani ke Hasnain Shifayaab hogaye to Hum 3 din roza rakhenge. Hasnain Kareemain shifayab hogaye to nazr puri karne keliye Sayyeda-e-Kainat aur Maula-e-Kainat aur Sayyeda-e-Kainat ki Khadima Hazrat Fizza ne roza rakha. Pehle din ka roza rakha to iftar keliye intezam karne keliye Maula Ali Alaihissalam bahar gaye, Aapne kuch kaam kiya ya karz liya. Un paiso se iftar ka khana tayyar hua. Ab iftar ka waqt hone me kuch he lamhe baaki they ke ek MISKIN (bhuka) shakhs darwaze pe aaya aur arz kiya: Ay Ahle Bayt mai bhuka kuch khane ko dijiye. Sayyeda-e-Kainat ne sabse pucha, ijazat li aur saara khana us miskin ko dediya aur fir sabne paani se iftar kiya.
Phir dusre din roza rakha, paani se sehri ki. Maula Ali Sher-e-Khuda bahar gaye iftar keliye intezam kiya. Sayyeda-e-Kainat ne khana banaya. Iftar keliye sablog baithe they ke darwaze pe aawaz aayi: Ay Ahle Bayt me YATEEM hun mujhe kuch khane ko do. Sayyeda-e-Kainat ne fir saara ka saara khana uthake usko dediya aur sabne paani se iftar kiya.
Teesre din fir sabne roza rakha paani se sehri ki, Maula Ali Alaihissalam ne iftar keliye paiso ka intezam kiya. Khana paka aur Sab dastarkhwan pe iftari keliye baithe they ke fir aawaz aayi: Ay Ahle Bayt mai KAIDI hun mujhe kuch khane ko do. Ahle Bayt ne saara khana usko dediya aur Khud paani se iftar kiya.

Ab Aaqa SallAllahu Alaihi wa Aalihi wa Sallam ne Hasnain Kareemain ko dekha, Wo Shifayab to hogaye they magar 3 din se bhuke they to Unke Phool jaise Khoobsurat Chehre murjha gaye they. Aaqa SallAllahu Alaihi wa Aalihi wa Sallam ne Unka Chehra dekha, Hazrat Ali ka Chehra dekha, pareshan hogaye aur Sayyeda-e-Kainat ke Ghar Tashreef legaye, dekha to Aapka Chehra-e-Aqdas bhi murjhasa gaya hai. Pucha: Beta kya hua? To Aapne 3 Din ka saara waqiya bataya. Aaqa SallAllahu Alaihi wa Aalihi wa Sallam gumgeen hogaye ke Meri Shehzadi Meri Ahle Bayt ne 3 Din kitni mashakkat uthayi. Abhi Aaqa SallAllahu Alaihi wa Aalihi wa Sallam gumgeen hue he they ke Allah Ta’ala ne Jibarel Alaihissalam ko bulaya aur Surah Dahar dekar bheja ke jao Mere Mehboob ke paas Ye Surat le jao!

Ab niche Us Mubarak Surat ki Aayat 5 se 22 tak Aayaten likhi gayin hain jo Waqiya se related hai. Sirf 3 din Apna khana MISKIN, YATEEM AUR KAIDI ko saqda karne se dekhiye Allah Ta’ala ne Ahle Bayt-e-Pak Alaihi-Mussalam ko kya kya Ata kiya. Jab 3 din sirf Khana kurban karne ka ye aalam hai to Karbala me 3 din bhuke pyaase rehkar Imam Hussain Alaihissalam ne Ali Asgar, Ali Akbar, Qasim, Gulshan-e-Risalat ke ek ek Phool kurban kiye aur Khud bhi Kurban hogaye to Is Kurbani ke badle Allah ne Ahle Bayt ko kya kya Ata kiya hoga!! (Alaihim Afdalus Salawatu was Salaam)

Bismillahhir-Rehmanir-Raheem

  1. Beshaq mukhlis aur ita’at guzar (Sharab-e-Tahoor ke) aisi jaam piyenge jisme (khusbu, rangat aur lizzat badhaane keliye) Kafoor ki aamezish hogi.
  2. (Kafoor Jannat ka) ek aisa chashma hai jisse (khaas) bandgaan-e-Khuda piya karenge (aur) jahan chahenge (dusro ko pilaane keliye) usey choti choti nehro me bahakar (bhi) lejayenge.
  3. (Ye Bandagaan-e-Khaas wo hain) jo (apni) Nazren (mannat) puri karte hain aur us Din se darte hain jiski sakhti khoob fail jaane waali hai.
  4. Aur Apna khana Allah ki Mohabbat me (Khud uski talabo hajat hone ke bawajood isaran) mohtaaj ko aur yateem ko aur kaidi ko khilaate hain.
  5. (Aur kehte hain) ki hum to mahaz Allah ki Raza keliye tumhe khila rahe hain, na tumse kisi badle ke khastgaar hai aur na shukrguzri ke (khwahishmand) hain.
  6. Hame to Apne Rab se us Din ka khauf rehta hai jo (chehron ko) nihayat siyah (aur) badnuma kardene wala hai.
  7. Pas Allah unhe (khauf-e-Ilahi ke sabab se) us Din ki sakhti se bacha lega aur unhe (Chehron par) Rounaq aur Taazgi aur (Dilo me) Sururo Masarrat bakshega.
  8. Aur is baat ke iwaj (ke) unhone sabr kiya hai (rehne ko) Jannat aur (pehanne ko) Reshami poshakh ata karega.
  9. Ye log usme takhton par takiye lagaye baithe honge, na waha dhoop ki tapish payenge aur na sardi ki shiddat.
  10. Aur (Jannat ke darakhton ke) saaye Unpar jhuk rahe honge aur unke (mewo ke) guchhe jhukar latak rahe honge.
  11. Aur (khuddam) unke gird chandi ke bartan aur (saaf suthre) shishe ke gilaas liye firte honge.
  12. Aur shishe bhi chandi ke (bane) honge jinhe unhone (har ek ke talab ke mutabik) thik thik andaze se bhara hoga
  13. Aur Unhe waha (Sharab-e-Tahoor ke) aise jaam pilaye jayenge jinme Zanjabeel ki aamezish hogi.
  14. (Zanjabeel) us (Jannat) me ek aisa chashma hai jiska naam Salsabeel se rakha gaya hai.
  15. Aur Unke ird gird aise (masoom) bachhe ghoomte rahenge, jo hamesha usi halat me rahenge, jab aap unhe dekhenge to unhe bikhre hue moti gumaan karenge.
  16. Aur jab aap (Bahisht par) nazar daalenge to wahan (kasrat se) Nematen aur (har taraf) badi saltanat dekhenge.
  17. Aur (Unke Jismon) par baarik resham ke sabz aur dabeej atlas ke kapde honge, aur Unhe chandi ke kangan pehnaye jayenge aur Unka Rab Unhe pakiza sharab pilayega.
  18. Beshaq ye Tumhara sila hai aur Tumhari Mehnat Maqbool hochuki.

Allahumma Salle Ala Sayyedina Muhammadiw wa Ala Aali Sayyedina Muhammadin.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s