Hazrat Shaah Abdur Razzaaq Wilaayat Ali rahmatullāhi alaihi

44404751_1417683051699548_1968168737622196224_o

Hazrat Shaah Abdur Razzaaq Wilaayat Ali rahmatullāhi alaihi :

Alqaab :
‾‾‾‾‾‾‾‾
Deewaana Shaah, Shehanshaah e Mevaad.

****************
Aap ki wilaadat 25 Moharram 1292 Hijri (March 1875 A.D.) ko Disa (Gujarat) me hui.

Aap ke waalid ka naam Hazrat Abdul Qaadir aur waalida ka naam Bibi Zainab hai.

****************
Aap Hazrat Mehboob Ali Shaah (Devgadh, Gujarat) rahmatullāhi alaihi ke mureed aur khalifa hain.

Hazrat Ulfat Ali Shaah (Badhnagar, Madhya Pradesh) se bhi Aap ko khilaafat mili hai.

Aap Chishti aur Rifai silsila ke shaikh hain.

****************
1341 Hijri (1923 A.D.) me Aap ne Mevaad ke Maharaana se 30 bigha zameen khareedi aur aabaadi se door apni khaanqaah taamir ki. Kisi ne puchha ke ‘Baaba! Itni door jangal me kaun aayega?’ Aap ne farmaaya ‘Yaha jangal me mangal hoga.’

Badi ta’adaad me log Aap ki baargaah me apni pareshaaniyo ke ilaaj ke liye aate the. Aap ke laaye gaye mareez par Aap padhkar dam karte to use foran shifa haasil ho jaati.
Aaj bhi log Kapasan Aap ke mazaar par shareer jinn wa aaseb, jaadoo tona, junoon aur deemaaghi beemaariyo se najaat paane ke liye aate hain aur faiz haasil karte hain.

****************
Karaamat :
‾‾‾‾‾‾‾‾‾‾‾‾‾
(1) Ek baar Aap apne ghar me ronak afroz the. Achaanak Sayyed Ramazaan Ali ghabhraaye hue Aap ki baargah me haazir hue. Aap ne puchha ‘Ramazaan Ali khairiyat to hai?’ Ramazaan Ali ne arz kiya ‘Huzoor! ALLĀH ta’ala ne aap ki dua se pota ata kiya hai, jis ki tabiyat badi aleel hai. Pehle bhi ek poti hui magar dekhte hi dekhte dunya se chali gai. Is pote ki bhi yehi haalat hai. Kahi is pote se bhi mehroom na reh jaau. Huzoor! Maine to azaan padhkar Us ka naam Rifaaqat Ali rakh diya hai. Ab laaj aap ke haath me hai. Aap dua farmayen ke ALLĀH use zindagi ata farmae.’

Aap ne Sayyed Ramazaan Ali ke chehre par nazar daali to dekha ke un ke chehre par maayoosi chhai hui thi. Foran Aap ne apne qareeb rakha hua ek safed kapda uthaaya aur Ramazaan Ali ko dekar farmaaya ‘Jaao, Is kapde ko bachche ke badan Par daalkar us ka naam Ya’aqoob Ali rakh do.’

Sayyed Ramazaan Ali kapda lekar apne ghar pahunche aur bachche ke badan par wo kapda daal diya aur bachche ka naam Ya’aqoob Ali rakh diya. Foran wo sehatyaab ho gaya.
Wo bachcha bada hokar Sayyed Ya’aqoob Ali Bukhari ke naam se mash’hoor hua. Aur wo kapda abhi bhi bataur e tabarruk un ke ghar waalo ke paas maujood hai.

(2) Ek baar Aap safar me the. Ek Shakhs Aap ke hujre me chori karne ke iraade se daakhil hua aur hujre me talaashi lena shuru kar di. Us ka khayaal tha ke Yaha bade bade log aate hain aur qeemati nazraane pesh karte hain to koi qeemati cheez mil jaayegi. Magar waha koi cheez na mili. Tabhi us ki nazar kitaabo par padi us ne gusse me aakar sabhi kitaabo ko uthaaya aur kapde me baandhkar Kalaal ke kunve me daal diya.

Hazrat ne safar se hi apne Khaadim Ahmad Mulla ko khabar bhijwai ke ‘Mere hujre me chori ho chuki hai. Us ka pata lagaao.’ Ahmad Mulla ne Kapasan ke thaanedaar ko ittela di aur logo me bhi ye baat phail gai. Lekin chor ka kuchh pata nahi laga aur chori kiye hue maal ka bhi pata nahi laga.

Kuchh din ke baad Aap Kapasan waapas tashreef laaye to Ahmad Mulla ne sab haqeeqat e haal sunai.
Sunte hi Aap ko jalaal aa gaya aur farmaya ke ‘Falaan shakhs ko haazir karo.’ Foran us shakhs ko aap ki baargah me haazir kiya gaya. Us ke aate hi Aap ne irshaad farmaaya ‘Meri kitaaben kaha hain?’ Jab wo khaamosh raha to aap ne phir se farmaaya ‘Tum bataate ho ya main bataau?’ Aap ki aawaaz me wo aṡar tha ke wo aap ke qadmo me gir aaya aur kehne laga ‘Huzoor! Mujhe muaf kar dijiye, Aa’inda aisi harkat nahi karunga. Kitaaben maine Kalaal ke kunve me daal di jo paani se bhara hua tha. Huzoor! Ab kaise laaun?’ Tab aap ne Ahmad Mulla ko hukm diya ke ‘Is ke saath jaao aur meri kitaaben le aao.’
Hukm paate hi Ahmad Mulla us shakhs ke saath kunve par pahunche aur lohe ka aala (hook) kunve me daala to us e koi cheez phansi. Jab us ko khinchkar baahar nikaala to dekha ke kapde me saari kitaben bandhi hui hai. Us ko kholkar jab dekha to kitaabo ke upar paani ka koi aṡar nahi tha aur kitaben bilkul sukhi thi, jo Hazrat ki khidmat me pesh kar di gai. Hazrat muskuraaye aur aa’inda chori na karne ki naseehat karke us shakhs ko muaf kar diya.

****************
Aap ka wisaal 8 Safar 1363 Hijri (3 Feb 1944 A.D.) ko hua.

Aap ka mazaar Kapasan (Rajashtan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Abdur Razzaaq urfe Deewaana Shaah rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.