Hazrat Shaikh Sayyed Sadr-ud-deen Mohammad Raajan Qattaal Suharwardi rahmatullāhi alaihi

52550242_1516601768474342_7916217109892300800_n

Aap I wilaadat 26 Sha’abaan 730 Hijri (14 June 1330 A.D.) ko Uch (Zila Bahawalpur) me hui.

Aap ke waalid ka naam Hazrat Shaikh Sayyed Ahmad Kabeer bin Sayyed Jalaal-ud-deen Haidar Hasan Surkh-Posh Bukhari rahmatullāhi alaihi aur waalida ka naam Sayyeda Bibi Faatima hai.

Aap ke daada Sayyed Jalaal-ud-deen Haidar Hasan Surkh-Posh Bukhari rahmatullāhi alaihi 630 Hijri (1232 A.D.) me Sultaan Nasir-ud-deen Mahmood bin Shams-ud-deen Altamash ke zamaane me Bukhara se Hindustan tashreef laaye the.

*********************
Aap apni waalida ka doodh nahi pee rahe the. Jab Aap ke bade bhai Hazrat Makhdoom Jahaaniyan Jahaangasht ko khabar di gai to unho ne farmaaya ‘Ye Qutub hain. Akele doodh nahi piyenge. Koi dusra doodh peeta bacha laakar waalida ke dusri jaanib se doodh pilaao to hi wo doodh piyega.’

Jab Maahe Ramazaan aaya me Aap ne doodh pina band kiya to Hazrat Makhdoom Jahaaniyan Jahaangasht ne farmaaya ‘Ye Qutub hai aur Maahe Ramazaan ki ta’azeem karta hai. Din me doodh nahi piyega, sirf raat ko hi doodh piyega.’

*********************
Aap ne apne waalid Hazrat Shaikh Sayyed Ahmad Kabeer rahmatullāhi alaihi se ta’aleem haasil ki.
Phir apne biraadar Hazrat Makhdoom Jahaaniyan Jahaangasht Saayed Jalaal-ud-deen Husain rahmatullāhi alaihi se baatin ta’aleem hail ki.

*********************
Aap bahot hi muttaqi wa parhezgaar aur paabande sharia he.

Aap puri zindagi isha’at e Islaam aur ta’aleem e deen karte rahe.
Aap ki ta’aleem wa faiz se beshumaar logo ko hidaayat mili.

ALLĀH ke fazl se log Aap ko dekhkar aur Aap se guftagu karke musalman ho jaate the.
Ek martaba ek mehfil me ek kaafir musalman hua aur us ke saath 300 dusre ghair-muslim ne Islaam apnaaya.

Kaha jaata hai ke taqreeban 3,40,300 logo ne Shaikh Sayyed Sadr-ud-deen Raajan Qattaal rahmatullāhi alaihi se Bai’at ki thi.

Uch aur aas paas ke ilaaqe ke logo ke dilo par Aap ki hukoomat thi. Is liye ‘Raajan’ ke laqab se mash’hoor hain.
Aur kaṡrate ibaadat o riyaazat aur mujaahida aur mukhaalifat e nafs aur dushmane deen par sakhti ki wajah se ‘Qattaal’ ke laqab se mash’hoor hain.

*********************
Ek martaba Shaikh Saarang ne Aap se arz kiya ‘Huzoor! Aap ke khaane me se bacha hua roti ka tukda mujhe inaayat farmaayen to main use batore tabarruk tanaawul karun.’ Aap ne irshaad farmaaya ‘Jab tum panj gaana namaaz paabandi aur ikhlaas ke saath ada karne lago tab mere aas aana.’ Shaikh Saarang ne Aap ke farmaan ki taamil ki. Jab wo dobaara Hazrat ki baargaah me haazir hue to Aap ne farmaaya ke ‘Aap namaaze Israaq wa Chaasht ka wa’ada karo hum tabarruk ka wa’ada karte hain. Hum saath me khaana khaayenge.’
Sub’hān Allāh, Aap ke tarbiyat ke is haseen tareeqe ne Shaikh Saarang ko ibaadat guzaar wali e kaamil bana diya.

*********************
Aap ka nikaah Hazrat Moeen-ud-deen bin Naeem-ud-deen ki saahabzaadi se hua.
Aap ke 6 saahabzaade aur 1 saahabzaadi hain.

*********************
Aap (apne bhai) Hazrat Makhdoom Jahaaniyan Jahaangasht Sayyed Jalaal-ud-deen Husain rahmatullāhi alaihi ke mureed aur khalifa hain.
Aur ‘Suharwardi Jalaali’ silsila ke shaikh hain.

Aap ke khulfa :
(1) (Aap ke saahabzaade) Hazrat Shaikh Sayyed Husaam-ud-deen Hasan rahmatullāhi alaihi (Jo Sultaan Firoz Shaah Tughlaq ke zamaane me isha’at e Islaam ke liye Kara-Manikpur tashreef le gaye the.) (Parsaki);
(2) Hazrat Shaikh Sayyed Kabeer-ud-deen Ismāeel rahmatullāhi alaihi (Uch / Pakistan);
(3) Hazrat Makhdoom Shaikh Saarang Mohammad Khamis urfe Abdullāh Rumi rahmatullāhi alaihi (Majhgawa, Uttar Pradesh)

****************
Aap ka wisaal 16 Jamaadi uṡ Ṡaani 827 Hijri (16 May 1424 A.D.) ko hua.

Aap ka mazaar Uch (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Sayyed Sadr-ud-deen Mohammad Raajan Qattaal Suharwardi rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.