Hazrat Shaikh Sayyed Abu Mohammad Burhaan-ud-deen Abdullāh Bukhari rahmatullāhi alaihi

40048698_1379312692203251_653091090647220224_n

Laqab :
‾‾‾‾‾‾
Qutb e Aalam.

****************
Aap ki wilaadat 14 Rajab 790 Hijri (18 July 1388 A.D.) ko hui.

Aap ke waalid ka naam Hazrat Sayyed Naseer-ud-deen Mahmood bin Hazrat Sayyed Jalaal-ud-deen Husain Bukhari Makhdoom Jahaaniyan Jahaangast rahmatullāhi alaihi aur waalida ka naam Bibi Haajra binte Sayyed Qaasim Husaini hai.

Aap Husaini saadaat hain.

Aap ke waalid Sayyed Naseer-ud-deen Mahmood ki bahot si biwiyo me se Bibi Haajra jab bhi Makhdoom Jahaaniyan Jahaangasht rahmatullāhi alaihi ki baargaah me haazir hoti aap un ko dekhkar adab ke saath khade ho jaate aur aap ne un ka laqab ‘Sa’adat khaatoon’ rakha tha. Ye dekhkar dusri biwiyo ne ta’ajjub ke saath Makhdoom Jahaaniyan Jahaangasht ko is ki wajah puchhi to aap ne farmaya ‘Is Sa’adat khatoon ke batan se kuchh waqt me ek Qutb e waqt tashreef laane wala hai aur mujhe hukm e ilāhi ke is ki ta’azeem ki jaaye.’

Aap ki wilaadat Hazrat Makhdoom Jahaaniyan Jahaangasht rahmatullāhi alaihi ke wisaal ke 4 saal aur 4 mahine baad hui.

Aap ki umr 10 saal ki tab aap ke waalid ka inteqaal ho gaya.

****************
Aap ke chacha Hazrat Sayyed Sadr-ud-deen Raju Qattal rahmatullāhi alaihi ne aap ko bashaarat di thi ki ‘Tumhe Gujarat jaakar zindagi guzaarni hai aur waha ke logo ko paighaam e haq pahunchana hai aur rushd o hidaayat deni hai.’

Aap Sultaan Muzaffar Shaah ke daur me Aap Uch (Punjab) se Patan tashreef laaye. Aur jab un ke bete Sultaan Ahmad Shaah ne Ahmedabad aabaad kiya to un ki guzaarish par aap Patan se Ahmedabad tashreef laaye aur Vatva ilaaqe me qayaam kiya.
Aur Sultaan ki guzaarish par Ahmedabad shaher ke liye hamesha aabaad rehne ki dua farmai : ‘Ahmad Aabaad Abdul Aabaad In shaa Allāh Raoofum bil-ibaad.’

******************
9 saal ki umr ek martaba aap ko ye khayaal aaya ke ‘Kaash mujhe Huzoor Nabi e kareem sallallāhu alaihi wa sallam ka zamaana e paak naseeb hota to main Aap ke Naalain shareef chumne ki ijaazat maangta aur apne aap ko khush-qismat samajhta.’
Aap farmaate hain ‘Us ke baad mujhe Huzoor Nabi e kareem sallallāhu alaihi wa sallam ki ziyarat naseeb hui. Maine dekha ke Shehanshaah e Risaalat Mohsin e Insaaniyat sallallāhu alaihi wa sallam tashreef laaye he aur mere saamne khade hain. Aap ke ishq me beetaab hokar maine apna sar foran aap ki Naalain mubarak par rakh diya.
Aap ke naalain mubarak nihaayat hi khubsurat the. Wo itne halke the ke un ka wazan 16 dirahm se bhi zyada na tha. Naalaine paak se mushk o ambar ki khushbu aa rahi thi. Huzoor sallallāhu alaihi wa sallam is tarah khade the ke meri sirf naak rakhi ja sake itni hi jagah Aap ke dono pairo ke darmiyaan thi.
Main apni peshani, chehra aur aankhen Aap ke dono pair mubarak ke darmiyaan rakhkar bahot der tak rota raha. Mere Aansoo se aap ke mubarak naalaine paak gile ho gaye. Main bahot der tak rota raha aur khushbu ko mehsoos karta raha.’

**********
Hazrat Shaikh Ahmad Ganj-bakhsh Khattu Maghribi rahmatullāhi alaihi ne aap ko ek jaa-namaaz aur wuzu ke liye mitti ka ek bartan ata faraamaya tha.

**********
Karaamat :
‾‾‾‾‾‾‾‾‾‾‾‾‾‾
(1) Ek martaba aap raat ko namaaz e tahajjud ke liye uthe. Aap sahen me se guzar rahe the ke koi cheez aap ke paanv mubarak se takrai. Chot lagne ki wajah se aap ki zabaan se be-ikhtiyar ye alfaaz nikle ‘Lakdi hai, Loha hai, Patthar hai, Khuda jaane kya hai?’
Jab subah hui to dekha ke woh lakdi ka bada tukda ek taraf se loha dusri taraf se lakdi aur teesri taraf se patthar jaisa ho gaya tha.

Aur aaj tak kisi ki samajh me nahi aaya ke woh kya hai.
Is me jo hissa Loha ho gaya hai us me baarish ke mausam me jang lag jaata hai, jo hissa Lakdi ho gaya hai use agar khurecho to khaalis lakdi ka buradh nikalta hai, aur jo hissa patthar ka hai wo bilkul patthar jaisa chikna aur chamkdaar maaloom hota hai aur ise dekhne wale hazraat keh uthte hain ‘ALLĀH jaane kya hai.’

(2) Ek baar Hazrat Makhdoom Sayyed Sharf-ud-deen Hasan Mash’hadi rahmatullahi alaihi ne apne 2 saahabzaade Sayyed Qutb-ud-deen aur Sayyed Saadullāh ko Hazrat Qutb e aalam ke mureed hone ke liye farmaaya. Dono saahabzade Hazrat Qutb e aalam se umr me bade the. Is liye unho ne kaha ‘Qutb e aalam ki topi hamare sar par nahi aa sakegi.’ Ya’ni wo is qaabil nahi ke hum un se bai’at karen.
Hazrat Makhdoom Sayyed Sharf-ud-deen ne dono se farmaaya ‘Theek hai. Hum sirf un se mulaaqaat kar lete hain.’ Us waqt Hazrat Qutb e aalam Khambhat me tashreef farma the. Hazrat Makhdoom Sayyed Sharf-ud-deen aur un ke dono saahabzade safar karke Khambhat pahunche tab aap wuzu kar rahe the. In hazraat ko dekhkar aap muskuraye aur farmaaya ‘Meri topi in ke sar par kaise aa sakti hai? Aur inhe kis tarah di jaa sakti hai?’ Ye sunkar Hazrat Makhdoom Sayyed Sharf-ud-deen ke dono saahabzaado ko ta’ajjub hua aur wo dono un ke aqeedatmand ho gaye aur foran bai’at ki. Phir aap ne 2 topiya dono bhaiyo ko di aur un ke sar par topi rakhkar farmaaya ‘Ye tum dono ke kaan tak pahunche itni lambi hai.’

*****************
Aap ka nikaah Bibi Aamina se hua.

Aap ke 12 saahabzaade hain.
Jin me Hazrat Sayyed Naasir-ud-deen Mohammad Dariya-nosh, Hazrat Sayyed Siraaj-ud-deen Mohammad urfe Shaah e aalam rahmatullāhi alaihi aur Hazrat Sayyed Shaah Zaahid urfe Michdi Peer mash’hoor hain.
Aur Saahabzaadiyo me Bibi Maryam mash’hoor hain.

******************
Aap Hazrat Sayyed Nasir-ud-deen Mahmood rahmatullāhi alaihi ke mureed aur khalifa hain.
(Aap ke chacha) Hazrat Sayyed Sadr-ud-deen Raajan Qattal rahmatullāhi alaihi aur Hazrat Shaikh Ahmad Ganj-bakhsh Khattu Maghribi rahmatullāhi alaihi ne Aap ko khilaafat ata farmai hai.

Aap ‘Suharwardi Jalaali’ silsila ke Shaikh hain.
Aap ke Khulfa :
(1) Hazrat Shaah e aalam Shaikh Sayyed Siraaj-ud-deen Mohammad rahmatullāhi alaihi,
(2) Hazrat Sham e Burhaani Shaikh Sayyed Uṡmaan Mash’hadi rahmatullāhi alaihi,
(3) Hazrat Shaikh Abdul Lateef Faarooqi rahmatullāhi alaihi (Patan),
(4) Hazrat Qaazi Mohammad rahmatullāhi alaihi.

****************
Wisaal se pehle 2 din tak Aap ko bahot tez bukhaar tha. Phir bhi Aap Farz namaaz ba-jama’at ada karte aur nafl namaaz aur roz ke awraad o wazaa’if ada karte rahe.
Teesre din bhi namaaz e fajr ba-jama’at ada ki. Phir hujre me jaakar apne pariwaar ko tasalli di. Phir Shaikh Mubarak ko farmaaya ‘Main eimaan ki salaamati ke saath dunya se intiqaal kar raha hu.’ Phir apni mubarak topi apne khaas khalifa Shaikh Abdul Lateef Faarooqi ko ata farmai. Phir 3 martaba ‘Ya Hayyu Ya Qayyoom Ya Kareem’ padha aur aalam e baqa me kooch kar gaye.

****************
Aap ka wisaal 7 Zil Hijja 858 Hijri (28 November 1454 A.D.) ko tulu aaftaab se pehle 67 saal ki umr me hua.

Aap ka mazaar Vatva, Ahmedabad (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Qutb e aalam Sayyed Burhaan-ud-deen Abdullāh Bukhari rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.