Hazrat Shaikh Haafiz Abu Saeed Zaki-ul-Qadr Mujaddidi rahmatullāhi alaihi

20229150_1089353081199215_7482620895283697552_n

Hazrat Shaikh Haafiz Abu Saeed Zaki-ul-Qadr Mujaddidi rahmatullāhi alaihi :

Aap ki wilaadat 2 Zil Qa’ada 1196 Hijri (10 October 1782 A.D.) ko Rampur hui.

Aap ke waalid ka naam Hazrat Shaah Safi-ul-Qadr bin Azeez-ul-Qadr Mujaddidi aur waalida ka naam Faiz Jahaan Begum binte Shaikh Muhammad Murshid Mujaddidī hai.

Aap Hazrat Mujaddid-e-Alfe-Ṡaani Imaam Shaikh Ahmad Faarooqi Sirhindi rahmatullāhi alaihi ki nasl se hain.

****************
Aap ko bachpan se hi bacho ke saath khel-kood me dilchaspi nahi thi.

Ek martaba Aap Hazrat Maulana Zia-un-Nabi ke saath Lucknow gaye. Waha ek durwesh ek masjid me hi raha karte the. Jab wo us masjid me gaye to us durwesh ne Aap ko dekhkar bashaarat ki ke ‘Ye ladka ek aala maqaam par faaiz hoga.’

****************
11 saal ki umr me Aap Haafize Qur’an hue.
Hazrat Qaari Naseem se Tajweed ki ta’aleem haasil ki.
Aap bahot khubsurat aawaaz me umda tilaawat e Qur’an karte. Jab Makka mukarrama gaye to waha ke Arabi ulama ne bhi Aap ki Qir’at ki ta’areef ki.

Aap ne Mufti Sharf-ud-deen se uloom-e-zaahiri ki ta’aleem haasil ki.
Maulana Shaah Rafi-ud-deen bin Shaah Waliullāh Mohaddeeṡ Dehlwi rahmatullāhi alaihi se bhi ta’aleem haasil ki.
In ke ilaawa Hazrat Shaah Abdul Azeez Mohaddeeṡ Dehlwi rahmatullāhi alaihi, Hazrat Maulana Siraaj Ahmad ibn Muhammad Murshid, Hazrat Shaah Ghulaam Ali Dehlawi rahmatullāhi alaihi se bhi ta’aleem haasil ki,

19 saal ki umr me uloom-e-zaahiri ki ta’aleem mukammal kar li.

Phir apne waalid Hazrat Shaah Safi-ul-Qadr Mujaddidi rahmatullāhi alaihi se tasawwuf aur tareeqat ki ta’aleem haasil karna shuru kiya.
Is ke baad Hazrat Shaah Dargaahi rahmatullāhi alaihi se ta’aleem haasil ki, jo Naqshbandi aur Qaadri silsila ke shaikh hain. Hazrat se Khilaafat bhi haasil ki. Bahot saare log Aap ke mureed bhi hue.
Phir Aap ne Hazrat Qaazi Ṡanā-ullāh Panipati rahmatullāhi alaihi ko khat likhkar majeed ta’aleem ke liye guzarish ki. Hazrat ne farmaaya ke ‘Hazrat Shaah Ghulaam Ali Dehlawi rahmatullāhi alaihi ki baargaah me jaao, ye behtar rahega.’
Hazrat ke farmaan par Aap 7 Moharram 1225 Hijri (February 1810 A.D.) ko Hazrat Shaah Ghulaam Ali Dehlawi rahmatullāhi alaihi ki baargaah me haazir hue aur Hazrat ke mureed hue. Aur Hazrat ki khidmat me rehkar ta’aleem aur faiz haasil karte rahe. Shaah Ghulaam Ali Dehlawi Aap se bahot mohabbat karte the.

11 Jamaadi ul Awwal 1231 Hijri (1816 A.D.) ko Hazrat Shaah Ghulaam Ali Dehlawi rahmatullāhi alaihi ne Aap ko Sajjaada nasheen banaaya aur Halaqa e Zikr karaane ki aur Hadeeṡ aur Tafseer ki tadrees ki zimmedaari ata farmai. Hazrat ne farmaaya ke ‘Kuchh logo ko is se ta’ajjub hoga ke Abu Saeed me kya khaas hai. H Magar ye yaad rakhna ke is ne dusre masha’ikh se ijaazat milne ke baad bhi mujh se bai’at ki hai aur apne mureedo ko bhi chhod diya hai.’

Jamaadi ul Awwal 1233 Hijri (1818 A.D.) me Hazrat ne Aap ko bashaarat farmai ke ‘Tumhe Qayyoomiyah ka darja ata kiya gaya hai.’

****************
Ek martaba Aap ke shaagird Muhammad Asghar ne ek martaba Aap se arz kiya ‘Huzoor! Kai martaba aankh na khulne ki wajah se namaaze tahajjud ada nahi kar paata hu.’ Aap ne farmaaya ‘Tum mere khaadim se keh dena ke wo mujhe yaad kara de. Main jab tahajjud ke waqt uthunga to tumhe bhi jaga dunga.’ Muhammad Asghar ne aisa hi kiya. Us din se jab bhi tahajjud ka waqt hota to Muhammad Asghar ki aankh khul jaati jaise kisi ne jaga diya ho.

****************
1249 Hijri (1834 A.D.) me Aap Hajje Baitullāh ke liye rawaana hue.
Aap ne apne saahabzaade Hazrat Khwaja Shaah Ahmad Saeed Mujaddidi rahmatullāhi alaihi ko Khaanqaahe Mazhariya ka zimmedaari sonpi.
Raaste me har shaher me chaahne waalo ne Aap ka khub istiqbaal kiya. Aap Ramazaan 1249 Hijri Mumbai tashreef laaye aur Shawwaal me Hajj ke safar par rawaana hue.
Jeddah jaane ke liye jahaaz ka kiraaya bhi de diya. Magar phir Aap ne us jahaaz se jaana mauqoof rakha aur dusre jahaaz se jaane ka tay kiya. Aap jis dusre jahaaz se rawaana hue wo waqt par pahuncha aur pehle waala jahaaz ayyaame Hajj ke baad Jeddah pahuncha.
Zil Hijjah ki shuruat me Aap pahunche to Aap ke mureed aur Shaikh-ul-Haram Maulana Muhammad Jaan ne Aap ka istiqbaal kiya. Shaikh Abdullāh Siraaj, Mufti Shaikh Umar Shaafi, Mufti Sayyed Abdullāh, Meer Ghani Hanafi, Shaikh Yāseen Hanafi, aur Shaikh Muhammad Aabid Sindhi aur deegar ulama wa masha’ikh ne bhi Aap ka istiqbaal kiya.
Hajj ada larne ke baad Aap beemar ho gaye aur Aap ko dast aur bukhaar ho gaya. Aap bahot kamzor ho gaye. Aap Makka se Madeena munawwara tashreef laaye. Yaha Aap kuchh tandurast ho gaye. Maahe Rabi ul awwal Aap ne Madeena shareef me guzaara. Yaha Aap ne Halaqa e Zikr bhi kiya jis me Shaikh-ul-Haram aur bahot saare log saamil hue.
Phir Aap Madeena se waapas aane ke liye nikle. Raaste me Aap ki tabiat phir se na-saaz hui. Jab Maahe Ramazaan aaya to Aap ne roza rakha to Aap ki sehat aur kharaab hone lagi. Is ke baad Aap ne har roze ke badle Fidiya dene ke liye farmaaya.
22 Ramazaan 1250 Hijri ko Aap Tonk shaher me pahunche. Tonk ke Nawaab ne Aap ka istiqbaal kiya. Aap kuchh din waha muqeem rahe.
Eid-ul-Fitr ke din Aap ne farmaaya ke ‘Koi bhi ameer ya dunyadaar shakhs mujhe milne na aaye. Mujhe is se taariki ka ehsaas hota hai.’ Phir apne saahabzaade (2) Shaah Abdul Ghani se farmaaya ke ‘Hamesha Sunnato ke paaband rehna aur dunyadaar logo se door rehna.’ Phir farmaaya ‘Main tumhe aur Shaah Abdul Mughni ko mere Ashghaal and Awraad ki ijaazat ata karta hu.’
Phir ek Haafiz ko Surah Yā-Seen ki tilaaqat karne ke liye farmaaya. Haafiz ne 3 martaba Surah Yā-Seen ki tilaawat ki. Phir Aap ne use roka aur farmaaya ‘Ab rukhsat hone ka waqt aa gaya hai.’
Is tarah Eid-ul-Fitr ke din Zohar aur Asr ke darmiyaan Aap ka inteqaal hua.

Aap ki namaaze janaaza Qaazi e Tonk Maulana Khaleel-ul-Rahmān ne padhai.
Nawaab Wazeer-ud-Daula aur badi ta’adaad me log saamil hue.

Aap ke jism e aqdas ko Delhi laaya gaya. 40 din baad bhi Aap ka jism aqdas waisa hi taaza lag raha tha aur Aap ke jism ke neeche jo kapda rakha gaya tha wo kisi khaas qism ki khushboo se mo’attar tha. Jise batore tabarruk sambhalkar rakha gaya.

Aap ko Khaanqaah e Mazhariya me Hazrat Shaah Ghulaam Ali Dehlawi rahmatullāhi alaihi ke bagal me dafn kiya gaya.

****************
Tasannif :
‾‾‾‾‾‾‾‾‾‾‾‾
Aap ne ‘Hidaayat-ul-Taalibeen’ naam se mash’hoor kitaab hai.

****************
1244 Hijri me Aap ne Calligraphy me 888 safaat me pura Qur’an majeed likha. Jis ki ek naqal Madeena munawwara me ‘Rubaat Mazhari’ me rakhi gai hai.

****************
Pariwaar :
‾‾‾‾‾‾‾‾‾‾‾‾
Aap ka nikaah Zubdah binte Shaikh Ghulam Siddeeq ibn Shaikh Azeem-ul-Qadr Mujaddidi ke saath hua.

Aap ke 3 saahabzaade hain :
(1) Shaah Ahmad Saeed
(2) Shaah Abdul Ghani
(3) Shaah Abdul Mughni.

****************
Aap Hazrat Shaah Ghulaam Ali Dehlawi rahmatullāhi alaihi ke mureed aur khalifa hain.
Aap ‘Naqshbandi Mujaddidi Mazhari’ silsila ke Shaikh hain.

Hazrat Shaah Dargaahi rahmatullāhi alaihi ne Aap ko Naqshbandi aur Qaadri silsila ki khilaafat ata farmai hai.

Aap ke khulfa :
(1) Hazrat Shaah Raoof Ahmad Raaft Mujaddidi rahmatullāhi alaihi
(2) Hazrat Shaah Khateeb Ahmad Mujaddidī bin Shaah Raoof Ahmad Raaft rahmatullāhi alaihi
(3) Hazrat Shaah Abdul Ghani Mujaddidi rahmatullāhi alaihi
(4) Hazrat Shaah Abdul Mughni Mujaddidi rahmatullāhi alaihi
(5) Hazrat Maulana Muhammad Shareef rahmatullāhi alaihi (Sirhind)
(6) Hazrat Mulla Khuda Burdi Turkistani rahmatullāhi alaihi
(7) Hazrat Mulla Ala-ud-deen rahmatullāhi alaihi
(8) Hazrat Shaikh Sa’adullāh rahmatullāhi alaihi
(9) Hazrat Maulana Abdul Kareem Turkistani rahmatullāhi alaihi
(10) Hazrat Maulana Ghulaam Muhammad rahmatullāhi alaihi
(11) Hazrat Mian Asghar rahmatullāhi alaihi (Delhi)
(12) Hazrat Sayyed Ismāeel Sinnari Husaini Maaliki Sudani rahmatullāhi alaihi

****************
Aap ka wisaal 1 Shawwaal 1250 Hijri (31 January 1835 A.D.) ko Shanichar ke roz hua.

Aap ka mazaar Delhi me Khaanqaah e Mazhariya me hai.

****************
Ek martaba Shaikh Allāh Bakhsh Hazrat Abu Saeed rahmatullāhi alaihi ke mazaar ki ziyarat ke liye Delhi tashreef laaye. Aap ne khawaab me un ko bashaarat farmaai ke ‘Tumhare saamaan me Angrezo ka diya hua certificate maujood hai, use phaad daalo. Mo’min ko ghair muslim ke certificate ki zaroorat nahi hai.’
Shaikh Allāh Bakhsh us certificate ko bhul gaye the. Unho ne apne saamaan se certificate dhundha aur use phaad daala aur is tarah un ke dil se ghair muslim ki mohabbat ko nikaal diya.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Haafiz Abu Saeed Mujaddidi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.