Hazrat Sayyed Shah Mutaahir-ud-deen Suhrawardi rahmatullāhi alaihi

 

 

No photo description available.

Alqaab :
‾‾‾‾‾‾‾‾‾‾‾‾‾‾
Tabl-e-Aalam Baadshaah, Nat’har Auliya, Ganj-ul-Israar, Trichi Sarkaar.
******
Aap ki wilaadat 358 Hijri (969 A.D.) me hui.
Aap ke waalid ka naam Hazart Sayyed Ahmed Kabeer bin Sayyed Ikhthiyaar aur walida ka naam Bibi Faatima binte Sayyed Ali hai.
Aap Husaini saadaat hain.
Aap ke daada Hazrat Sayyed Ikhthiyaar rahmatullāhi alaihi Madeena munawwara se Istanbul tashreef laaye the.
Sultaan Abdul Majeed Khan ne un ko Bahanasa ki jaagir ata farmai thi. Un ke baad Aap ke waalid Bahanasa ke hakim bane.
******
Aap ke waalid ko 45 saal ki umr tak koi aulaad nahi thi. Wo Madeena munawwara pahunche aur Roza e Rasool par iltija pesh ki. Jum’aa ki raat ko Huzoor sallallāhu alaihi wa sallam khwaab me tashreef laaye aur ek phal ata farmaaya aur irshaad farmaaya ke ‘Ahmad Kabeer! Fikr mat karo. Ye phal khaa lo. In shaa Allāh ALLĀH ke fazl se tumhare yaha ek aisa beta hoga jo Qutub banega aur phal me jitne bij hain tumhare bete ki ta’aleem aur faiz se utne log Wali banenge.’
Hazart Sayyed Ahmad Kabeer ne us phal ko khaaya to aisa lazeez paaya ke kabhi zindagi me aisa phal khaaya ho nahi tha.
Jab Aap ki waalida Bibi Faatima haamila hui to Hazrat Ali Murtaza ne khwaab me bashaarat farmaai ke ‘Tumhare yaha jo beta tashreef laane waala hai wo Qutub e zamaan hoga.’
Aap ki wilaadat ke baad Sayyed Ahmad Kabeer ne 2 rak’at Salaat-ush-Shukr ada ki.
*******
Aap ki umr 7 saal thi tab Aap ke waalid Sayyed Ahmad Kabeer ka intiqaal hua. Is ke baad Aap ko Bahanasa ka Sultaan banaaya gaya aur Sayyed Ali Aap ke wazeer bane.
10 saal baad Sayyed Ali ka intiqaal hua to un ke saahabzaade Sayyed Shams-ud-deen aur Sayyed Shamsullāh Aap ke wazeer bane.
Jab Aap ki umr 21 saal ki thi tab Aap ne khwaab me dekha ke ‘Ek shakhs aag me jal raha hai aur zor se chilla raha hai. Aap ne us se puchha ke “Tum kaun ho aur tum ne aisa kya gunaah kiya hai jo tumhe ye saza mil rahi hai?” Us shakhs ne kaha ke “Main jab haakim tha tab logo par zulm karta tha aur us me mujhe khushi milti thi. Marne ke baad mujhe is ka azaab ho raha hai.”
Phir Aap ne dusra khwaab dekha ke ‘Ek bahot hi khubsurat baagh hai jis me phoolo ki behtareen khushboo aa rahi hai aur us baagh me ek mahel hai. Us mahel me ek nooraani chehre waala shakhs zikr e ilāhi kar raha hai. Aap us shakhs ke qareeb pahunche to us shakhs ne zikr rok diya. Aap ne us se puchha ke “Kya aap mujhe bata sakte hain ke aap kaun hain aur itn aala maqaam aap ko kaise mila?” Us shakhs ne bataaya ke “Main ek faqeer hu aur dunya me halaal rizq kamaane ke baad jo waqt baaqi rehta use namaaz, zikr aur nek amal karne me guzaarta tha. Jis se ALLĀH ta’ala ne apne fazl se mujhe ye maqaam ata farmaaya hai.”
Is ke baad Aap ke dil ka aalam badal gaya aur Aap be-chain rehne lage. Aakhirkaar Aap ne apne bhai Syaayed Jalaal-ud-deen aur dono wazeero ko bulaakar tamaam baat bataai aur farmaaya ke “Dunya ke aish o aaraam ek din mitti me mil jaayenge. Jo shakhs dunya ko talaash karta hai wo kutte ki tarah hai aur jo ALLĀH sub’hān wa ta’ala ki raza talaash karta hai wo sher ki tarah hai. Tamaam buzurgo ka yehi kehna hai. Is liye main sab kuchh chhodkar peer o murshid ki talaash karna chaahta hu.” Aap ka baat sunkar wo sab ko bahot sadma laga. Aap ne farmaaya “Mere baad ab hukoomat par tumhara haq hai.”
Phir jab Aap ne apni waalida ko yeh baat batai to wo khaamosh ho gai. Kuchh waqt baad unho ne socha ke “Mera beta ALLĀH ki raah me jaa raha hai. Use na rokna hi behtar hai.” Unho ne Aap ko ijaazat di aur kaha “Beta! Tum meri fikr mat karna.”
Is ke baad Aap ne logo ko bulaakar apne bhai ko taaj pehnaaya aur farmaaya “Maine 15 saal tak tumhara sardaar rehne ki khush-qismati haasil ki. Ab main mere bhai ko ye zimmedaari deta hu aur ummeed rakhta hu ke aap sab use is me madad karenge.” Ye sunkar logo ne Aap ke pair pakad liye aur sab ko chhodkar na jaane ke liye arz karne lage. Aap ne farmaaya “Maine faisla kar liya hai. Chunaanche aap sab mujhe roke nahi. ALLĀH ne chaaha to main baad me aap se milne aaunga.”
Hazrat Shams-ud-deen urf Shams Goya aur Hazrat Shamsullāh urf Shams Farrah samet 900 logo ne Aap ke saath aane ka faisla kiya.
Kai mahino tak sab log Aap ke saath jangalo aur pahaado me safar karte rahe. Ek raat Huzoor sallallāhu alaihi wa sallam khwaab me tashreef laaye aur irshaad farmaaya “Kal subah Hazrate Khizr alaihis salaam tashreef laayenge aur tumhe tumhare Peer o murshid ka pata bataayenge.”
Dusre din tulu aaftaab ke baad ek sabz libaas pehne hue khubsurat buzurg tashreef laaye aur farmaaya “Main tumhe peer e kaamil ke paas le jaata hu. Un ka naam Hazrat Sayyed Ali hai aur wo Qutub e zamaan hai aur Hurmuz shaher me muqeem hain.”
Sab log Hazrate Khizr alaihis salaam ke saath Hurmuz gaye. Hazrat Syyaed Ali ki baargaah tak pahunchaane ke baad Hazrate Khizr alaihis salaam ne faraamaya “Mera kaam tumhe yaha tak pahunchaana tha.” Ye kehker rukhsat hue.
Huzoor sallallāhu alaihi wa sallam ne Hazrat Syyaed Ali ke khwaab me tashreef laakar irshaad farmaaya “Maine Sayyed Mutaahir-ud-deen ko tumhare paas bheja hai. Use apna mureed banaao.” Hazrat Syyaed Ali Zualqi foran uthkar baahar tashreef laaye aur farmaaya “Aao Sayyed Mutaahir-ud-deen. Main tumhare maqsad se waaqif hu. ALLĀH ta’ala tumhaari aamad par rahmat wa barkat naazil farmaae.”
Phir Jumeraat ke roz Hazrat Syyaed Ali Zualqi Aap ko apni khaanqaah me le gaye. Waha ek bada bartan rakha hua tha. Jis me garm paani rakha hua tha jo agar jism par pad jaaye to chamdi jal jaaye. Hazrat ne Aap ko us paani me koodne ke liye farmaaya. Aap foran ‘Ya Ali’ kehkar us paani kood gaye. ALLĀH ke fazl se wo garm paani thanda ho gaya aur aap ko koi takleef na hui.
Is imtihaan me kaamyaab hone ke baad Hazrat ne Aap ko mureed banaaya aur ‘Nat’har Wali’ ka laqab ata faramaaya.
Jab Aap se puchha gaya ke “Aap garm paani se dare kyun nahi?” Aap ne jawaab diya “Jo sacha aashiq e ilāhi hota hai wo ita’at ki khaatir aag me koodne se bhi nahi darta. Us ke ishq ki barkat se aag bhi thandi ho jaati hai chaahe wo aatish fisha (volcano) ho ya jahanaam.”
Is ke baad kai saal tak Aap Hazrat ki khidmat me rehkar ta’aleem wa faiz haasil karte rahe.
******
Phir Aap apne 900 shaagirdo ke saath Hajje Baitullāh ke liye tashreef le gaye. Hajj ke baad jab Aap Madeena munawwara pahunche to ek saal tak waha qayaam kiya.
Is dauraan ek martaba raat ko Aap apne mureed Hazrat Ayyoob Qalandar ke saath Roza e Rasool par ziyarat ke liye tashreef le gaye. Roza e Rasool sallallāhu alaihi wa sallam par ba-adab khade the ke achaanak Aap gaa’ib ho gaye. Jab Aap waapas aaye to Hazrat Ayyoob Qalandar ne Aap ko is ke baare me puchha to Aap ne bataaya ke ‘Jab main Surah Alam Nashrah ki aayat tilaawat kar raha tha ke Huzoor sallallāhu alaihi wa sallam tashreef laaye. Mujhe gale lagaaya aur apne saath roza mubarak ke andar le gaye aur apna luaabe dahen mere munh me rakha aur farmaaya ke tumhare liye bashaarat hai ke tum Qutb-ul-Aqtaab banoge.’
Is ke baad ek martaba Jum’aa ke roz Aap ne aalam e wajd me farmaaya ke ‘ALLĀH ne apne fazl se mujhe Qutb-ul-Aqtaab banaaya hai aur meri roohaani hukoomat bahot saare auliya par hai.’ Ye sunkar Hazrat Mahmood Karkhi, Hazrat Zain-ud-deen Misri, Hazrat Azeezullāh, Hazrat Younus, Hazrat Zaheer-ud-deen Qalandar aur Hazrat Abdul Majeed waha maujood the. Unho ne aitraaz kiya. Aap ne apni kamli apne upar aur in hazraat ke upar rakhi to sab ko Aalam-e-Nasoot, Aalam-e-Malakoot, Aalam-e- Jabaroot aur Aalam-e-Lahoot nazar aaye. Aap ne sab ko apna darja e wilaayat zaahir karne ke liye farmaaya. Hazrat Mahmood Karkhi aur Hazrat Zain-ud-deen Misri Aalam-e-Nasoot tak pahunch sake. Hazrat Azeezullāh aur Hazrat Younus Aalam-e-Malakoot tak pahunch sake. Hazrat Zaheer-ud-deen Qalandar aur Hazrat Abdul Majeed Aalam-e- Jabaroot tak pahunch sake. Aur Aap Aalam-e-Lahoot tak pahunche. Phir Aap ne kamli hataai to sab apne asli haal me aa gaye. Aap 3 din tak wajd me rahe aur sab ne dekha ke Aap ke chehre se naor zaahir ho raha tha aur aap ne isi haal me 72 martaba ‘Anal Haq’ farmaaya. Jab Aap wajd se baahaf aaye to wo 6 auliya Aap ke qadmo me gir gaye aur muafi maangi.
Madeena munawwara me 1 saal ke qayaam ke baad Huzoor sallallāhu alaihi wa sallam Aap ke khwaab me tashreef laaye aur farmaaya ‘Mutaahir-ud-deen! Hind waapas jaao. Tumhare zariye bahot saare log hidaayat haasil karenge.’
Aap pahaado aur sehra me safar karte hue Jeddah pahunche. Waha bahot saare jahaaz the. Magar Aap ke paas maal na hone ki wajah se kisi ne Aap ko apne jahaaz par bithaaya nahi. Sab ko fikrmand dekhkar Aap ne farmaaya ‘Fikr mat karo. Jis ne Hindustan ki jaanib jaane ke liye farmaaya hai wohi jahaaz ka bhi intazaam karenge.’ Aap ne abhi ye baat farmaai thi ke ek jahaaz aaya aur us ka kaptaan aap ko jahaaz me bithaane ke liye tayyaar hua. Aap apne saathiyo ke saath jahaaz par sawaar hokar 40 din ka safar karke Tiruchirapuram pahunche aur pahaado me qayaam kiya.
******
Yaha jinnaat ne Aap ko bahot pareshaan kiya magar Aap bardaasht karte rahe.
Ek martaba Aap namaaz fajr ke baad ek chattaan ke qareeb zikre ilāhi me mashgool the. Jinnaat ne us chattaan ko dhakka diya. Aap ne apne haath aur pair se rok diya. Aap ko jalaal aa gaya aur jinnaat par ek nazar daali to wo wahi jalkar khaak ho gaye.
Ek martaba Kaveri nadi me sailaab aaya aur log bhaagkar Aap ki khidmat me haazir hue. Us waqt Aap Hazrate Khizr alaihus salaam se guftagu kar rahe the. Aap ne apni chaadi ko bagal me maujood chattaan par maara. Us ki aawaaz sunkar paani rook gaya aur aahsta aahista waapas jaane laga. Is tarah ALLĀH ta’ala ke fazl se log jaan o maal ke nuqsaan se bach gaye. Is ke baad Aap ‘Table aalam Baadshaah’ ke naam se mash’hoor ho gaye.
******
5 saal baad Aap Tiruchirapuram me tashreef laaye. Aap ta’aleem wa faiz se bahot badi ta’adaad me log islaam me daakhil hone lage. Is se pareshaan hokar ghair muslimo ka ek giroh Aap ki baargaah me aaya aur arz kiya “Aap musalmano ko lekar kisi door maqaam par chale jaao.” Aap ne farmaaya “Tum log mujhe koi achhi jagah bataao.” Un logo ne Aap ko ek Chakr diya aur kaha “Ise phenkiye. Chakr jaha girega wo jagah hum Aap ko de denge.” Aap ne chakr lekar use uttar ki jaanib phenka. Wo chakr waapas mudkar dakhkhin me gaya aur mandir me but ki gardan par laga aur but ke do tukde ho gaye. Ye dekhkar un logo ne us mandir ko khaali kar diya. Aap apne saathiyo ke saath us me muqeem hue.
******
Ek martaba Aap ke bhai Hazrat Sultaan Sayyed Jalaal-ud-deen Hajj ke liye gaye to waha Aap ke ek mureed se mulaaqaat hui. Us se Aap ke baare me jaankaari haasil karke woh Tiruchirapuram aaye. Aap se milkar unho ne Aap ko Bahnasa aane ke liye arz kiya. Aap ne farmaaya ki “Huzoor sallallāhu alaihi wa sallam ke farmaan par main khidmate deen ke liye Trichi aaya hu.” Phir Aap ne un se un ki saahabzaadi Sultaan-un-Nisa ka nikaah apne khalifa Hazrat Sayyed Abdur Rahmān se karaane ke liye guzarish ki. Unho ne apni saahabzaadi ka nikaah Hazrat Sayyed Abdur Rahmān rahmatullāhi alaihi se kiya.
******
Trichi ke Raaja ko 60 saal ki umr tak koi aulaad nahi thi. Ek martaba woh apni biwi ke saath Hazrat ki khidmat me haazir hua aur aulaad ke liye dua ki arz ki. Aap ki dua se ALLĀH ta’ala ke fazl se Raaja ki biwi ko hamal raha. Us ke yaha ek ladka aur ek ladki paida hue. Jis me se ladki ke haath aur pair nahi the. Raaja use lekar Hazrat ki baargaah me haazir hua. Aap ne kuchh padha aur us ladki ke jism par paani chhidka to woh bilkul sahi aur tandurast ho gai. Raaja use lekar apne mahel me waapas aaya to phir se us ki haalat pehle jaisi ho gai. Raaja dobaara use lekar Hazrat ki baargaah me haazir hua. Aap ne phir se kuchh padha aur us ladki ke jism par paani chhidka to woh bilkul sahi aur tandurast ho gai. Lekin jaise hi Raaja use lekar apne mahel me waapas aaya to phir se us ki haalat pehle jaisi ho gai. Teen baar aisa hone par aakhirkaar Raaja ne woh ladki Aap ko de di.
Aap ne us ka naam Haleema rakha. Kabhi kabhi Aap use Raheema bhi kehte the. Bachpan main Jugnu ko dekhkar use pakad ne ki koshish karti thi. Lekin jab pakad nahi paati to Hazrat jugnu ko pakdkar use dete. (Is tarah us ka naam ‘Mama Jigni’ ho gaya.)
18 saal ki umr me jab Raaja ka beta Raaja bana tab wo Hazrat ki baargaah me haazir hua aur faiz hail kiya aur Taaj-posi ke jalse me Mama Jigni ko bhejne ke liye iltija ki. Jalse ke baad us ne apni bahen ko bahot saara sona aur heere jawahiraat diye. Magar unho ne use lene se inkaar kiya. Raaja ne bator yaadgiri kuchh lene ke liye guzarish ki. Mama Jigni ne mahel me se ek Tota le jaana chaaha.
Hazrat Tabl-e-Aalam ne ek Qur’an majeed likha aur Mama Jigni ko Qur’an majeed ki ta’aleem ata farmai aur woh Qur’an majeed unhe padhne ke liye diya. Unho ne Qur’an majeed padhna shuru kiya to un ki ta’aleem se woh tota bhi Qur’an majeed sikh gaya aur bahot khubsurat aawaaz me Tilawat e Qur’an karne laga.
******
Aap Hazrat Shaikh Sayyed Ali Sarmast Suharwardi Zualqi rahmatullāhi alaihi ke mureed aur khalifa hain.
Aap ke khulfa :
(1) Hazrat Sayyed Abdur Rahmān rahmatullāhi alaihi (Tiruchirappalli, Tamil Nadu)
(2) Hazrat Baaba Fakhr-ud-deen Suharwardi rahmatullāhi alaihi (Penukonda, Andhra Pradesh)
(3) Hazrat Sayyed Shaah Baba Haidar Auliya Husaini rahmatullāhi alaihi (Mulbagal, Karnataka).
******
9 Ramazaan 417 Hijri ko Aap ne apne shaagirdo aur mureedo ko jama karke farmaaya “Ab mere intiqaal ka waqt bahot qareeb hai. Jum’aa ke roz main is dunya se kooch kar jaaunga. Aap log pareshaan aur ghamzad mat hona. Har shakhs ko maut ka jam pina hai chaahe wo ameer ho ya ghareeb, wali ho ya aam insaan, Nabi ho ya ummati. Hamesha ALLĀH ta’ala ki mohabbat ko mazbooti se thaame rakhna aur unya ki mohabba me mat padna. Ye tumhare liye dunya aur aakhirat me beshumaar rahmat aur barkat ka zariya hoga. Namaaz, Roza aur Zikr ko bhl mat jaana. Khaas kar raat ke waqt zikr zaroor karna ye tumhe ALLĀH ta’ala se jode rakhega.” Phir farmaaya ki “Mere baad Hazrat Sayyed Abdur Rahmān Sajjaada nasheen honge.”
Saheri ke waqt Aap ne apne bistar par roti aur paani mangwaaya. Kyun ki Aap kamzori ke sabab uth nahi paa rahe the. Logo ne arz kiya “Huzoor! Aap jaeefi ke saba roza na rakhen. Baad me is ki qaza kar lena ya kaffaara ada kar dena.” Aap ne farmaaya “Maine apni zindagi me ek bhi roza nahi chhoda. Main apne aakhri roze chhodna nahi chaahta. Mujhe khushi hogi agar haalate roza me mere jism se rooh nikle.”
Aap 5 din tak thoda khaakar saheri aur iftaar karte rahe.
15 Ramazaan ko Aap ne apne mureedo ko jama karke farmaaya “Main Malik-ul-Mulk se milne jaa raha hu.”
Phir Aap ne jaa-namaaz manqwaaya aur namaaze Ishaa ada karne lage. Haalte sajda me Aap ne intiqaal farmaaya.
******
Aap ka wisaal 15 Ramazaan 417 Hijri (30 October 1026 A.D.) ko Raat ko hua.
Aap ka mazaar Tiruchirappalli (Tamil Nadu) me hai.
******
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Mutaahir-ud-deen Tabl-e-Aalam Suhrawardi rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.

Advertisements