Hazrat Sayyed Mian Abdullāh Shaah Qaadri Kashmiri rahmatullāhi alaihi

39265704_1369985243135996_1169083234613460992_n

Aap ki wilaadat 1158 Hijri (1738 A.D.) me Miraj (Kashmir) me hui.

Aap ke waalid ka naam Hazrat Sayyed Shaah Rizqullāh urfe Lutfullāh bin Maulana Sayyed Shaah Fat’hullāh hai.

Aap Hasani Saadaat hain.
Aur Hazrat Ghauṡe aazaam Shaikh Sayyed Abdul Qaadir Jilani radiy-Allāhu ta’ala anhu ki nasl se hain.

******************
Bachpan se hi Aap paabande shariat the.
7 saal ki umr me Aap apne daada ke saath panj waqta namaaz aur taraawih masjid me ba-jama’at ada farmaate.

Aap ne apne daada Maulana Sayyed Shaah Fat’hullāh rahmatullāhi alaihi se Qur’an aur Hadeeṡ ki ta’aleem haasil ki.
Phir un se tareeqat aur ma’arifat ki ta’aleem haasil ki.

Aur Maulana Sayyed Shaah Fat’hullāh Kashmiri rahmatullāhi alaihi ki mureed hue aur khilaafat haasil ki.

******************
Ek raat ko khwaab me Aap ko Hazrat Ghauṡ aazaam Abdul Qaadir Jeelaani radiy-Allāhu ta’ala anhu ki ziyarat haasil hui aur Hazrat ne Aap ko samundar dikhakar farmaaya ‘Khidmate deeen ke liye is samundari raaste se jaana hai.’

Subah ko Aap ne apne daada mausuf se is khwaab ko bayaan kiya to unho ne apne saahabzaade Sayyed Shaah Rizqullāh ko bulaakar farmaaya ‘Jadde amjad ke farmaan ke mutaabiq ab is saahabzaade ko khidmate deene mubeen ke liye bhejna hoga.’

*******************
1193 Hijri (1773 A.D.) me 35 saal ki umr me Aap Kashmir se Una, Gujarat tashreef laaye.

Us daur me Una ke haalaat aise the ke musalman ki ta’adaad bahot thi magar deen se bahot door aur be-amal the. Masjide thi magar namaazi nahi the. Chaaro taraf andh-vishvas aur jaadoo tona ka chalan tha. Sab log jaadoogaro se darte the.

Shuruat me Aap ne Jaama masjid me qayaam kiya aur durwesh ki tarah rahe. Aahista aahista Aap ki saadgi, paakizgi aur parhezgaari dekhkar logo ko aap ki buzurgi ka pata chala.

Us waqt Jaama masjid me jinnat ka basera tha. Raat ke waqt log aane se darte the. Namaaz ke liye aane waale bhi naamaze Isha ke baad foran masjid se nikal jaate the. Shuruat me Aap raat ko masjid ki sid’hiyo par raat guzaarte aur wahi ibaadat o riyaazat karte. Aap ki aamad ki barkat se Jinnaat masjid ko chhodkar chale gaye.

Us ke baad Aap ne logo ko shariat ki ta’aleem dena shuru kiya aur jaadoo ko muzammat ke baare me bataaya. Aap ki ta’aleem se bahot saare log jaadoo karne aur karaane se door hone lage. Aur bahot saare jaadoogaro ne aap ke daste aqdas par tauba kar li.

******************
Diu ke ilaaqe me Vaanja qaum jaadoo ki maahir thi. Jab Diu ke logo ko khabar mili ke Una me ek buzurg tashreef laaye hain aur logo ko jaadoo se najaat dilate hain to unho ne Aap ko Diu aane ke liye iltija ki. Una se Diu jaane ke liye sirf samundari raasta tha.
Devi Karsan naami ek jaadoogar ko pata chala to us ne tamaam mallaah ko keh diya ke ‘Jab ye buzurg Una se aaye to koi mallaah apni kashti me sawaar na kare.’
Jab Aap samundar kinaare pahunche to sab mallaah ne Aap ko kashti me bithaane se inkaar kar diya. Aap muskuraaye aur ‘Allāhu akbar’ ka naara lagaakar apne musalle ko paani par bichha diya aur us par baithkar Diu pahunch gaye.
Devi Karsan ko jab pata chala ke Hazrat Diu me tashreef laa chuke hain to us ne Aap ko rokne ke liye jaadoo ke zariye takleef dene ki koshish ki.
Diu ke log Aap se milne ke liye aaye tab Aap namaaz me mashgool the. Jab Aap namaaz se faarig hue to logo me se ek shakhs ko pait me shadeed dard shuru hua aur us ka pait bada hone laga. Wo foran daudkar Hazrat ke qadmo me gir pada. Aap ne apne roomaal se us ke sar par hawa daalna shuru kiya. Is se use kuchh raahat mehsoos hui.
Phir Aap ne apne khaadimo se farmaaya ke ‘Ek thaili me ret bharkar laai jaaye.’ Us thaili ko latkaai gai. Phir Aap ne khaadim se farmaaya ke ‘Is thaili ko kode maaro.’ Aap ke farmaan par khaadim us thaili ko kode maarne laga aur udhar Devi Karsan ke badan par kode ki maar padti rahi. Aakhir kaar wo bhaagkar Aap ki baargaah me aaya aur muafi maangi aur tauba karke Aap ke daste haq par eimaan laaya. Aap ne us ka naam ‘Abdullāh Deen’ rakha.

Kuchh mahine tak Aap Diu me muqeem rahe. Aap jis palang(bistar) par aaraam farmaate the wo haal me bhi Taar Mohammadbhai Vora ke pariwaar ke logo ki nigraani me maujood hai.

******************
Aap Una me sukoonat pazeer hokar logo ko ta’aleem wa faiz ata farmaate rahe.
Aap ke zariye beshumaar logo ne hidaayat haasil ki.

Aap bahot bade Muttaqi, parhezgaar aur Aabid o Zaahid the.
Har amal Sunnate Rasool ke mutaabiq karte aur logo ko bhi is ki ta’aleem wa taaqeed farmaate.
Aap Haasido ki di gai takleef par bhi sabr karte aur un ke liye dua e khair farmaate.

******************
Aap ne apne bhai Sayyed Fat’hullāh Kashmiri ko paighaam bhejkar apne bhatije Sayyed Abdur Razzaaq rahmatullāhi alaihi ko bulaaya. Wo Kashmir se Shajra e Nasab aur deegar tabarruqaat lekar Aap ki khidmat me haazir hue. Kuchh waqt baad Aap ne un ka nikaah Una ke ek Qureshi khaandaan me kiya.

Apne wisaal ke 2 saal pehle Aap ne Sayyed Abdur Razzaaq ko khilaafat ata farmai.

******************
Aqwaal :
‾‾‾‾‾‾‾‾‾‾
(1) Insaan ko chaahiye ke Maut ko yaad karta rahe ke yehi Nafs ki tamaam beemaariyo ka ilaaj hai.

(2) Insaan ko chaahiye ke dusro ke aib talaash karne ke bajaay khud ke aib ko talaash kare aur un ko door karke khud ki islaah kare.

(3) Makhlooq ke saath bhalai ye ALLĀH ki qurbat ka raasta hai.

(4) Zulm karne se hamesha bacho. Zaalim mazloom ki dunya kharaab karke apni aakhirat kharaab karta hai.

******************
Karaamat :
‾‾‾‾‾‾‾‾‾‾‾‾‾‾
Aap Saahib-e-Kashf the aur logo ke dil ke haalaat jaan lete the.

Aap ki dua se ALLĀH ta’ala ne beshummar logo ko beemaari se shifa ata farmai aur jaadoo se najaat ata farmai, pareshaaniyo se najaat ata farmai aur be-aulaad ko aulaad ata farmai.

(1) Apni jawaani ke aalam me Lahore me Chilla kashi karne ke baad Aap waha se rawaana ho rahe the to Aap ke saathi Abdullāh Meer ne Aap se kaha ‘Mohataram! Aap ne Chilla kashi karke ALLĀH ta’ala ka qurb haasil kiya hai to ALLĀH ta’ala ne Aap ko kya karaamat ata farmai?’
Aap use lekar bazaar me gaye aur Luhaar ke yaha pahunche. Luhaar ki bhatthi me haath daala aur sakht garm lohe ka tukda pakad liya aur use baahar nikaala. Jab bhatthi me se wo lohe ka tukda baahar nikaala to wo thanda ho gaya tha. Aap ne farmaaya ke ‘Ab to thandak hui ya nahi?’

(2) Junagadh ke Nawaab Haamid Khan Awwal ko jab pata chala ke Una me ek buzurg durwesh tashreef laaye hain to us ne Aap ko Junagadh aane ke liye guzarish ki. Magar Aap ne qaasid ko ye kehkar waapas bheja ke ‘Hum faqeero ko baadshaaho ka kya kaam?’ Aap ke is jawaab se nawaab khush hua.

Jab Nawaab ka shehzaada Bahaadur Khan shadeed beemaar hua aur bade bade hakeem us ka ilaaj na kar sake to Nawaab ne qasasid bhejkar dua ke liye iltija ki. Jab qaasid Aap ki khidmat me pahuncha to Aap ne ek kabootar mangwaaya aur use uda diya. Aur farmaaya ‘Jaao, Bahaadur Khan theek ho gaya hai.’
Qaasid jab Junagadh pahuncha to shehzaada theek ho gaya tha. Is se Nawaab ke dil me Aap ki aqeedat aur badh gai.

(3) Vanaak Baara me Jivi naami ghair muslim aurat Aap ko tohfa wa nazraana pesh karti thi. Ek martaba Aap us ke ghar ke paas se guzar rahe the to logo ki bheed dekhi. Puchhne par logo ne bataaya ke Jivi marne ke qareeb hai, kuchh logo ne kaha ke Jivi mar gai hai. Aap ne farmaaya ke ‘Jivi abhi mari nahi hai, wo uthkar mujhe naaryal paani pilaayegi.’ Aap ne andar jaakar Jivi ko aawaaz di to wo khadi ho gai aur Aap ke qadmo me gir padi.

(4) Jeevan Bu naami ek aurat ke ladke ko paagal kutte ne kaat liya. Us ke zeher ki aṡar se wo ladka behosh ho gaya. Ghar waalo ne socha ke ‘Ab ye ladka nahi bachega.’ Jab Aap un ke yaha tashreef le gaye to Aap ne apna roomaal nikaala aur use paani se bhigokar laane ke liye farmaaya. Logo ne kaha ‘Huzoor! Aisi haalat me is ke upar bhiga hua kapda nahi daal sakte.’ Magar Aap ne jaise hi wo bhiga hua roomaal us ladke par daala foran wo ladka hosh me aa gaya aur apni aankhe kholi.

(5) Ismāeel Kasbaati naami shakhs ke ladke ko Faalij (paralysis) ho gaya tha. Use Aap ki baargaah me laaya gaya. Aap ne ek bhar-pur nigaah-e-tawajjoh daali aur farmaaya ‘Beta! Khada ho jaa.’ ALLĀH ke fazl se wo bilkul tandurast ho gaya aur khada ho gaya.

(6) Noor Mohammad naami ek shakhs ko gurde ki pathari ki takleef thi aur peshaab ki takleef ki wajah se pareshaan the. Hakeemo ne ise laa-ilaaj bata diya. Aap ne unhe paani ke saath ek taaweez pilaaya to un ki pathari peshaab ke saath baahar nikal gai.

(7) Mohammad Is’hāq naami ek shakhs ko kisi ne jaadoo kar diya tha. Jis ki wajah se wo bahot dubla aur kamzor ho gaya tha. Log use lekar Aap ki baargaah me aaye

(8) Aa’isha Sulaimān naami ek aurat ko 13 saal se koi aulaad nahi thi. Aap ki baargaah me aakar dua ke liye arz ki. Aap ki dua se ALLĀH ta’ala ne us aurat ko aulaad ata farmai.

(9) Yousuf Surya naami Aap ka ek khaadim Aap ke liye doodh ka intazaam karta tha. Ek martaba doodh waale ne kaha ke ‘Bhens ne aaj doodh kam diya hai. Is liye main tumhe doodh nahi dunga.’ Khaadim ne Hazrat ki baargaah me aakar sab baat batai. Aap ne farmaaya ke ‘Jab wo doodh dohne ke liye jaaye to bhens se keh dena ke doodh mat dena.’ Jab doodh waala doodh dohne ke liye gaya to Khaadim ne bhens se kaha ke ‘Doodh mat dena.’ Bhens ne doodh nahi diya. Doodh waale ne Hazrat ki baargaah me aakar Aap se muafi maangi.
Is ke baad khaadim dusre logo ki bhens ko bhi kehta ke ‘Doodh mat dena.’ to wo bhens bhi doodh nahi deti. Logo ne pareshaan hokar Hazrat ki baargaah me arz ki. Aap ne foran khaadim se woh karaamat waapas le li.

(10) Jeevan bu Aap ko khaane ki daawat deti aur Aap apne shaagirdo ke saath un key aha khaana khaane jaate. Kai baar zyada shaagird hote aur Jeevan bu key aha khaana kam pakaaya hota to Aap pehle se jaan jaate aur khaane ke bartan par apna roomaal rakh dete. ALLĀH ke fazl se foran us khaane me barkat ho jaati aur sab logo ke liye kaafi ho jaata.

Isi tarah Aap ne Diu ki Vora qaum ke liye Anaaj me barkat ki dua ki thi. ALLĀH ke fazl se haal me bhi un key aha anaaj me barkat rehti hai.

******************
Aap Hazrat Maulana Sayyed Shaah Fat’hullāh Qaadri Kashmiri rahmatullāhi alaihi ki mureed aur khalifa hain.

Aap ke khalifa Hazrat Sayyed Abdur Razzaaq Qaadri Kashmiri rahmatullāhi alaihi hain.

******************
Aap ke mureedo ki ta’adaad badhne lagi to Aap ki shohrat se kuchh logo ke dil me hasad paida hua.

Jeevan Bu naami ek Vora aurat aur un ke ghar waale Aap ki bahot khidmat karte the. Aap un ke yaha qayaam karte the. Ibrāheem naami ek Sindhi shakhs ko ye baat pasand nahi thi. Us ke dil me hasad aur nafrat paida hui.
3 Zil Hijja 1224 Hijri (1810 A.D.) ko namaaze Zohar ke baad Aap apne hujre ki taraf jaa rahe the tab Ibrāheem Sindhi ne khanjar se Aap par hamla kiya. Aap jakhmi hokar gir pade. Phir ladkhadaate hue apne hujre me pahunche aur shaheed ho gaye.

******************
Inteqaal se pehle Aap ne wasiyat farmai ke ‘Qaatil ko koi na pakde balke us ka badla ALLĀH ta’ala ke par chhod diya jaaye.’ Jab Police ne qaatil ko pakda to Nawaab Haamid Khan ne Aap ki wasiyat ke mutaabiq qaatil ko chhod dene ka hukm diya.
Aap ke farmaan ke mutaabiq us shakhs ko kodh ki beemaari hui aur wo mar gaya. Us ke khaandaan me jitne bhi ladke hue un sab ko bhi kodh ki beemaari hui aur us ki nasl khatm ho gai.

******************
Aap ka wisaal 3 Zil Hijja 1224 Hijri (January 1810 A.D.) ko Sanichar ke roz hua.

Aap ka mazaar Jaama Masjid, Una (Gujarat) me hai.

****************
1962 A.D. me Diu ko Firnagi (Portugese) hukoomat ke qabze se aazaad karaane ke liye Hindustani lashkar ne jung ki. Hindustani jahaaz ne Telephone Office ki imaarat par bomb phenka. Magar samundar ki lahero ki wajah se nishaana chook gaya aur bomb us makaan me gira jaha par Hazrat ka hujra mubarak tha.
Diu fateh hone ke baad Hindustani hukoomat ne nuqsaan ka jaayza liya to Makaan maalik ne bataaya ke ‘Hamare makaan me ek bomb pada hai.’ Paarsi Brigadier ne bomb ko dekhkar puchha ke ‘Yaha par kisi buzurg ki dargaah hai?’ Jab use Hazrat ki qayaam-gaah (hujre) par le gaye to us ne apni topi utaarkar salaam pesh kiya aur kaha ke ‘Ye Hazrat ki karaamat hai ke bomb phata nahi. Agar ye bomb phat jaata to is ilaaqe me bahot zyada nuqsaan hota.’

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Mian Abdullāh Shaah Qaadri Kashmiri rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.