Hazrat Peer Sayyed Mohamamd Shaah Qaadri rahmatullāhi alaihi

51243177_1499066146894571_4899871383321837568_n

Aap ki wilaadat 15 Sha’abaan 1100 Hijri (June 1689 A.D.) ko Bijapur (Karnataka) me hui.

Aap ke waalid ka naam Sayyed Ameen-ud-deen Qaadri aur waalida ka naam Shaah Bibi hai.

Aap ke waalid Mughal baadshaah Aurangzeb ke zamaane me Madeena se Hindustan tashreef laaye the.

Aap ke naana Hazrat Khwaja Banda nawaaz Gaisu daraaz Sayyed Muhammad Husaini rahmatullāhi alaihi ki nasl se hain aur Husaini saadaat hain.

****************
Aap ki paida’ish ke pehle hi aap ke waalid ka inteqaal ho gaya. Aap abhi baaligh bhi na hue the ke aap ki waalida ka bhi inteqaal ho gaya. Is ke baad aap ki phuphi ne Aap ki parwarish ki.

****************
Aap ne apne chacha Hazrat Sayyed Abdur Rahmān Qaadri rahmatullāhi alaihi se ta’aleem haasil ki.

7 saal ki umr me Aap Haafiz e Qur’an hue. Aur Qir’at ke maahir hue.

9 saal ki umr me Aap ne Hazrat Sayyed Abdur Rahmān Qaadri rahmatullāhi alaihi se bai’at ki.

Is ke baad Aap majeed ta’aleem ke liye Hijaaz tashreef le gaye aur 6 saal Makka mukarrama me aur 7 saal Madeena munawwara me qayaam karke ilme deen haasil kiya aur buzurghaan e deen ke mazaar par haazir hokar faiz haasil karte rahe.

1123 Hijri (1711 A.D.) me Aap Ahmedabad tashreef laaye.

****************
Aap Hazrat Sayyed Abdur Rahmān Qaadri rahmatullāhi alaihi ke mureed hain.

****************
Aap Faarsi, Urdu aur Dakhani ke maahir the.

Aap ki likhi hui mash’hoor kitaaben :
(1) Noor ush Shuyukh (Mash’hoor Sufiya e kiraam ki Sirat)
(2) Majmua e Risa’il (Mash’hoor Sufiya e kiraam ke Shajar e Nasab)
(3) Ishqullāh (Soofi ki khaslato ka bayaan)
(4) Majmua e Ghazaliyaat (Tauhid ke muta’aalliq Faarsi Ghazalo ka majmua)
(5) Mukashifat (‘Qudsi’ takhallus ke saath 3 Faarsi Nazamo ka majuma)
(6) Maraṡia (Hazrat Imaam Husain radiy-Allāhu ta’ala anhu ki Shahaadat ki Nazamen).

****************
Aap ne apne mureedo ke saath ek Kutubkhaana (Library) banaaya jis me badi ta’adaad me Deeni kitaaben jama ki gai hain.

****************
Aap ne shaadi nahi ki thi.

Buzurgo ki sohbat aur khidmat ko ganimat samajhte the.
Aap Hazrat Shaah Wajeeh-ud-deen Alwi Gujarati Shattaari rahmatullāhi alaihi ke mazaar par ba-adab haazri dekar faiz haasil karte.

Aap Saadgi, Tawakkul aur Qanaa’at pasand karte the.
Logo se beniyaaz rehte the. Log Aap ko nazraana pesh karte to aap ye kehkar inkaar farmaate ke ‘Faqeero ke kis kaam ki? Jaao, le jaao’
Ek shakhs ne ashrafiyo ki ek thaili Aap ko pesh ki to aap ne qubool nahi farmai aur us se farmaaya ‘Faqeero ko is ki zaroorat nahi hoti. ALLĀH ke khazaane me kya kami hai, Apne jis bande ko jis qadr chaahta hai deta hai. Jaao apni thaili le lo aur dusre kaam me kharch karo.’

****************
Ek budhiya ne Aap se apni jhonpdi me tashreef laane ki darkhwast ki to aap ne farmaaya ke “Haan Haan! Jab is jagah aaunga phir isi jagah rahunga.’

Jab aap ka wisaal hua to aap ke mureedo ka Khayaal Aapko Hazrat Khwaja Moosā Suhaag rahmatullāhi alaihi ke qabrastan me dafn karne ka tha. Jab Aap ka janaaza lekar chale to us jagah par janaaza rakha aur namaaz e janaaza ada ki.
Namaaz se faarigh hokar jab mureedo ne janaaza uthaana chaaha to janaza na uth saka. Baaz samajhdaar mureedo ko Aap ke wo alfaaz yaad aa gae ke ‘Haan Haan! Jab is jagah aaunga to phir isi jagah rahunga.’ Chunaanche Aap ko usi jagah dafn kiya gaya.

****************
Aap ka wisaal 26 Jamaadi ul Awwal 1162 Hijri (May 1749 A.D.) ko hua.

Aap ka mazaar Pankore Naka, Ahmedabad (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Peer Sayyed Mohammad Shaah Qaadri rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.