Hazrat Miyan Meer Mohammad Qaadri rahmatullāhi alaihi

24312369_1169157789885410_4430799804558349722_nHazrat Hazrat Miyan Meer Mohammad Qaadri rahmatullāhi alaihi :

Aap ki wilaadat 957 Hijri (August 1550 A.D.) me Sevastan (Sindh) me hui.

Aap ke waalid ka naam Qaazi Daata bin Qaazi Qalandar aur waalida ka naam Bibi Faatima binte Qaazi Qadan hai.

Aap Hazrat Umar Faarooq radiy-Allāhu ta’ala anhu ki nasl se hain.

********************
Aap ke waalid ke inteqaal ke baad aap ki waalida ne aap ki parwarish aur ta’aleem wa tarbiyat farmai. Ta’aleem ke baad Aap ko dunya se mohabbat wa ragbat kam ho gai. Aap waalida ki ijaazat lekar murshid ki talaash ke liye rawaana hue.

Jab Hazrat Shaikh Khizr se mulaaqaat hui to aap bai’at karke un ki sohbat me rehne lage. Hazrat Shaikh Khizr jangalo aur pahaado me zyada rehte the. Peer ki sohbat me Aap ne baatini ta’aleem haasil ki. Jab taalim mukammal hui to Hazrat Shaikh Khizr ne Aap ko ijaazat ata farmai ke ‘Jaha jaana chaaho ja sakte ho.’

Aap ne Maulana Sa’adullāh aur Maulana Ne’matullāh se bhi ta’aleem haasil ki.

********************
Aap Lahore tashreef laaye aur ta’aleem e deen karte rahe.
Jab Aap ki shohrat badhne lagi aur badi ta’adaad me log jama hone lage tab Aap ne Lahore ko chhodne ka faisla kiya aur Sirhind ki taraf rawaana hue.

Sirhind me qayaam ke dauraan Aap shadeed beemaar ho gaye. Jab Aap haalaat bahot zyada kharaab ho gaye tab Aap ne Hazrat Ghauṡe aazam Abdul Qaadir Jeelaani radiy-Allāhu ta’ala anhu ko madad ke liye yaad kiya. Foran Ghauṡe aazam Hazrat Shaikh Khizr rahmatullāhi alaihi ke saath haazir hue aur aap ka haal puchha. Aap ne Ghauṡe aazam se iltija ki. Ghauṡe aazam ne apna dast e Mubarak aap ke badan par phera aur Aap ko paani se bhara hua ek pyaale diya. Jaise hi Aap ne paani piya Aap bilkul tandurast ho gaye.

Sirhind me qayaam ke dauraan Haaji Ne’amatullāh ne Aap ki bahot khidmat ki. Aap ne raazi hokar un ko baatini faiz ata karne ka iraada kiya. Ek hafte me Haaji Ne’amatullāh Aap se faiz haasil karke wilaayat ke a’ala maqaam par pahunch gaye.

Is ke baad Aap Sirhind se Lahore aa gaye aur wahi muqeem hue. Aur logo ko ta’aleem aur faiz ata karte rahe.

Mughal baadshaah Jahaangeer aur Shaah Jahaan Aap ki mulaaqaat ke liye aaye the aur Aap ne un ko naseehat farmai thi.

Mughal shehzaada Daara Shikoh Aap ka moaqqid tha.

****************
Aap saadgi pasand karte the. Shohrat se door rehne ki koshish karte. Tanhai me waqt guzaarna aur logo se kam milna pasand karte the. Kam se kam khaana khaate aur bahot kam sote. Aap maante the ke apne waqt ko behtareen tareeqe se ibaadat me guzaarna chaahiye. Aur apna libaas aam logo ki tarah hona chaahiye taake log soofi ko pehchaan na sake.

****************
Ek baar baadshaah Jahaangeer Aap ki baargaah me aaya to Aap ke khaadimo ne darwaaze par hi rokkar Hazrat ki ijaazat milne tak intazaar karne ke liye kaha. Kuchh der tak intazaar karne ke baad jab baadshaah Hazrat ke paas pahuncha to us ne kaha ‘Ba dar e darwes darbaane naa-bayd’ (Darwesh ke dar par darbaan nahi hona chaahiye). Aap ne foran farmaaya ‘Babayd keh sag e dunya na ayad’ (Ye yaha is liye hai ke dunya ke kutte andar na aa sake).
Is ke baad Jahaangeer ne aap se arz kiya ke ‘Main Deccan par hamla karne waala hu. Aap meri fateh ke liye dua farma dijiye.’ Itne me ek ghareeb aadami waha aaya aur Hazrat ke qadmo me sar jhukaakar 1 rupya nazraana ka pesh kiya. Aap ne us shakhs se farmaaya ‘Ye sikka uthaakar yaha maujood logo me jo sab se zyada ghareeb ho use ye sikka de do.’ Us shakhs sikka uthaakar ek ke baad ek durwesh ke paas gaya. Magar kisi ne use nahi liya. Us ne waapas aakar kaha ‘Huzoor in me se koi bhi durwesh ise lene ke liye raazi nahi hai. Aisa lagta hai ke kisi ko is ki zaroorat nahi hai.’
Aap ne Jahaangeer ki taraf ishaara karke farmaaya ‘Ye sikka is ghareeb ko de do. Ye sab se zyada ghareeb hai aur ise is ki zaroorat hai. Wo apni itni badi saltanat se raazi nahi hai aur Delhi se yaha bheek maangne ke liye aaya hai. Us ki bhuk aag ki tarah hai, jis tarah aag lakde ko jala deti hai waise hi ye aag us ke sukoon ko jalaati hai aur use mohtaaj, laalachi aur khaufnaak banaati hai. Jaao aur ye sikka use de do.’

****************
Aqwaal :
‾‾‾‾‾‾‾‾‾‾‾
(1) ALLĀH ke wali ke andar Jawaani me ibaadat aur ita’at e ilāhi ka aur nek amal karne ka jazba zyada hota hai magar jaise jaise umr badhti jaati hai wo jazba bhi badhta jaata hai.

(2) Jab koi durwesh kaamil ho jaata hai aur us ka qalb har shak se pare ho jaata hai tab koi cheez use nuqsaan nahi pahuncha sakti. Wo ek baadshaah ki tarah ho jaata hai jise dunyaawi baaten aṡar nahi karti.

(3) ALLĀH ta’ala ke siwa kisi dusre ki taraf tawajjoh karna Soofi ke darje ko kam kar deta hai.

(4) Nafs ki islaah (durust karna) Shariat (par amal) se hoti hai, Qalb ki islaah Tareeqat (ke faiz) se hoti hai, Rooh ki islaah Haqeeqat se hoti hai.

****************
Ek martaba Aap ke bhai apne watan se Aap ko milne aaye. Aap ne un ka isteqbaal kiya. Magar Aap ke ghar me khaane ki koi cheez maujood nahi thi. Aap ne apne bhai ko ghar me baithne ke liye kaha aur Aap baahar aaye aur bageeche me aakar namaaz padhkar ALLĀH ta’ala se dua ki ‘Rab ta’ala mere yaha ek mehmaan aaya hai aur mujhe tere karam par bharosa hai. Main use mere ghar me bithakar aaya hu. Tere siwa koi nahi jo mujhe madad kar sake.’ Ghaib se nida aai ‘Hum ne tumhare maangne se pehle tumhari aarzoo puri farma di hai.’
Itne me hi Aap ke bhai baahar aaye aur kaha ke ‘Aap baahar aaye us ke foran baad ek shakhs khaana lekar aaya hai aur aap ka inatazaar kar raha hai.’
Aap apne bhai ke saath andar tashreef le gaye to dekha ke waha par ek nihaayat khubsurat shakhs maujood hai. Us shakhs ne Aap ko salaam paish kiya aur arz kiya ke ‘ALLĀH ta’ala ne aap ke liye ye khaana bheja hai aur kuchh maal bheja hai aur farmaaya hai ke Hazrat Miyan Meer jo chaahe wo ata kiya jaayega.’
Aap ne us se puchha ke ‘Tum kaun ho?’ to us ne bataaya ke ‘Main ek aam shakhs hu.’ Aap ne use apne saath khaana khaane ke liye kaha to us ne kaha ‘Mera roza hai is liye main aap ke saath khaana nahi kha sakta.’ Aur wo waha se rawaana ho gaya. Asl me wo ek farishta tha.

********************
Aap Hazrat Shaikh Khizr Qaadri rahmatullāhi alaihi ke mureed aur khalifa hain.

Aap ke khalifa Hazrat Mulla Shaah Badakhshi rahmatullāhi alaihi hain.

********************
Aap ka wisaal 7 Rabi-ul-Awwal 1045 Hijri (22 August 1635 A.D.) ko Mangal ke roz shaam ko 88 saal ki umr me hua.

Aap ka mazaar Lahore (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Miyan Meer Mohammad rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.