Hazrat Maulana Shaah Mohamamd Habeeb-ur-Rahmān rahmatullāhi alaihi

49026003_1481127142021805_4394146332906881024_n
Alqaab :
‾‾‾‾‾‾‾‾
Mujaahid-e-Millat, Abdaal e waqt, Raees-ul-taarikeen.

**************
Aap ki wilaadat 8 Moharram 1322 Hijri (26 March 1904 A.D.) ko Peer ke din Bhadrak me hui.

Aap ke waalid ka naam Maulana Abdul Mannaan aur waalida ka naam Hikmat-un-nisa’ hai.

Aap Hazrat Abbaas ibn Abdul Muttalib radiy-Allāhu ta’ala anu ki nasl se hain.

**************
Aap ne Shaah Mujeeb-ur-Rahmān se Qur’an ki ta’aleem haasil ki.
Aur Maulana Safaqat Husain se Faarsi ki ta’aleem haasil ki.

Aap ne Allahabad jaakar Madrasa Subhaaniya me ta’aleem haasil ki.
Is ke baad Ajmer me Madrasa Moeeniya Uṡmaaniya me ta’aleem haasil ki.
Phir Jaamiya Naeemiya me Hazrat Sadr-ul-afaazil Allama Naeem-ud-deen Muradabadi se Hadeeṡ ki ta’aleem haasil ki.

**************
Is ke baad Madrasa Sub’hāniya me aap Sadr-ul-Mudarriseen (Head teacher) bane.
Apne peer ke wisaal ke baad Aap baghair tankhwaah ke ye kaam karte rahe.

Aap apni ta’aleem aur dars ke zariye isha’at e Islaam ka aur musalmano ke eimaan ki hifaazat ka kaam karte rahe.

**************
9 Rajab 1340 Hijri (1922 A.D.) ko Aap ka nikaah Bibi Umme Salama se hua.

Aap ko koi aulaad nahi thi. Aap ne ek ladke ko gaud liya tha. Jo Maulana Abdul Waahid rahmatullāhi alaihi ke naam se mash’hoor hain aur Aap ke Sajjaada nasheen hain.

**************
Aap ne 6 martaba Hajj e Baitullāh ki sa’adat haasil ki.
(1341 Hijri [1923 A.D.], 1374 Hijri [1955A.D.], 1387 Hijri [1967 A.D.], 1391 Hijri [1972 A.D.], 1393 Hijri [1974 A.D.], 1400 Hijri [1980 A.D.]).

Jab Aap Hajj ke liye gaye to arkaan ada karne ke baad Madeena munawwara pahunchne ke baad shuru me 2-4 din to Roza e aqdas par haazir hokar salaat o salaam arz karte rahe. Lekin us ke baad do-teen roz tak Roza e aqdas par haazir na hue balke Riyaaz ul jannah hi se salaat o salaam arz karke waapas aa jaate. Teesre ya chauthe roz hum log ko mukhaatib karke farmaane lage ke ‘Main Roza e paak par ye sochkar haazir nahi hota hu ke kahi mera chehra dekhkar mere Aaqa ko takleef na pahuche.’
Taqreeban chauthe roz Hazrat Riyaaz ul Jannat me namaaz e Ishraaq ada farmakar sidhe Roza e aqdas par tashreef laaye aur Roza e aqdas ke saamne simte qibla ki diwaar se muttasil adab ke saath haath baandhkar khade ho gaye. Aap ki ek jaanib Hazrat Habeeb e Millat Maulaan Abdul Tawwaab Habeebi aur dusri jaanib Hazrat Haaji Muhammad Ismāeel Barkaati haath baandhe khade hue the. Aap ki aankho se aansoo jaari the, Chehre ki paakiza kaifiyat aur nigaaho ki muaddabaana andaaz se zaahir ho raha tha ke kisi karam e khaas ka intazaar hai.
Aap us paakiza kaifiyat ke saath khade hue adab o ta’azeem me dooba hua salaat o salaam arz kar rahe the ke itne me kya dekhte hain ke Huzoor Nabi e kareem sallallāhu alaihi wa sallam ba-nafse nafis me aap ke saamne tashreef farma hain aur aap ke qareeb hokar Aap ke kandhe par apna dast e anwar rakha aur irshaad farmaaya ‘Habeeb ur Rahmān! Guzishta saal tum par jo zulm o sitam hua aur Hajj se tumhe rok diya gaya us se tum dil bardaashta hokar ye gumaan kar baithhe ke ab kabhi Madeena munawwara ki haazri muje naseeb na hogi aur tum maayoos hokar Madeena munawwara se rawaana ho gaye. Aisa gumaan tumne kyun kiya, Tum maayoos kyun hue? Suno! Jis ko main bulaaunga us ko koi taaqat, koi hukoomat rok nahi sakti. Dekh lo, Maine tumhe bulaaya to tumhe koi rok saka?’

Sarkaar e do aaalam sallallāhu alaihi wa sallam ki ziyaarat ke waqt Hazrat jo kurta pehne hue the wo kurta mubarak Hazrat Maulaana Abdul Quddoos Kashmiri ke paas aaj bhi tabarrukan mahfuz hai.

**************
Aap ne 4 martaba Baghdad shareef ki ziyarat ki.

**************
Aap zameendaar khaandaan se the. Magar hamesha saadgi se rehte the. Hamesha cycle par sawaari karte the.

Ghareebo aur mohtaajo ko madad karte the.
Ghareeb bacho ko padhaai ke liye madad karte the.

Aap jab faarigh hote tab ibaadat aur riyaazat me lage rehte.

**************
Karaamat :
‾‾‾‾‾‾‾‾‾‾‾‾‾‾
(1) Ek baar Aap apne mureed Maulana Abdul Rab ke saath Sadr-ul-afaazil Naeem-ud-deen Muradabadi se mulaaqaat ke liye jaa rahe the. Raaste me Dhela nadi aai. Nadi me paani bahot zyada hone ki wajah se Maulana Abdul Rab ghabharaye. Aap ne farmaaya ‘Fikr mat karo. Mera haath pakad kar mere saath chalo.’ Jab dono paani ke andar utre to Maulana Abdul Rab ye dekhkar hairaan hue ke aisa lag raha tha jaise paani ghutno tak hi aa gaya ho.

(2) Aap jis jagah muqeem the us gaanv me ek shakhs ko jinn ka aṡar ho gaya. Wo Jinn us shakhs ko aur ghar waalo ko pareshaan kiya karta tha. Ghar waalo ne faisla kiya ke Sarkar Mujaahid e Millat se jaakar arz karte hain. Jab tamaam ghar waale Hazrat ki baargaah me jaane lage to shareer jinn Hazrat ko gaaliya dene laga aur kehne laga ke ‘Wo Maulana mera kya bigaad paaega.’
Jab saare ghar waale Hazrat ke pass pahunche aur kaha ke ‘Huzoor! Wo jinn Aap ko gaaliya de raha hai aur aap ko bura keh raha hai.’ Aap ne farmaaya ‘Chalo main ghar aakar us ko dekhta hu.’
Jab Hazrat un logo ke saath un ke ghar pahunche to jis shakhs ko jinn ka asar tha wo gardan jhuka kar khaamoshi ke saath baitha hua tha. Aap ne farmaaya ‘Aye jinn! Ghar waalo ke mutaabiq to tu mujhe gaaliya de raha tha. Ab jab main saamne hu to tu khaamosh kyun hai?’ Us jinn ne kaha ke ‘Huzoor! Aap meri peeth par se kapda uthaakar dekhiye.’
Jab logo ne us shakhs ki peeth par se kapda hataaya to dekha ke us ki peeth par koda maarne ke nishaan the. Logo ke puchhne par us jinn ne kaha ke ‘Jab Hazrat yaha aane ke liye apne ghar se rawaana hue aur raaste me the to main bura bhala keh raha tha. Usi waqt Sayyedina Sarkaar Ghauṡe aazam Abdul Qaadir Jilani khud tashreef laaye aur meri peeth par kode maarkar farmaaya ‘Tu mere Habeeb ur Rahmān) ko bura bhala keh raha hai.’ Ye sunkar logo ko pata chala ke Sarkaar Ghauṡe aazam radiy-Allāhu anhu ki baargaah me aap kitne maqbool hain.

**************
Aap ne apne kai mureedo ko apni mehfil me Makka aur Madeena shareef ki ziyarat karaai thi.

**************
Aap Hazrat Ka’afi Qaadri Naqsbandi rahmatullāhi alaihi ke mureed hain.

Aap ko deegar 4 silsile ki bhi khilaafat mili hai.
(1) Hazrat Hakeem Sayyed Mohammad Ehsaan Saahib rahmatullāhi alaihi (Silsila Naqshbandiya-Mujaddidiya)
(2) Hazrat Shaikh-ul-Masha’ikh Maulana Sayyed Ali Husain Ashrafi Miyan Kichhauchhawi rahmatullāhi alaihi (Silsila Chishtiya-Nizaamiya-Ashrafiya aur Silsila Qaadriya Munawwariya)
(3) Hazrat Allama Maulana Zia-ud-deen Madani rahmatullāhi alaihi (Silsila Qaadriya wa Chishtiya)
(4) Hazrat Hujjat-ul-Islaam Maulana Haamid Raza Khan rahmatullāhi alaihi (Silsila Qaadriya –Barkaatiya -Razawiya)
(5) Hazrat Maulana Zahoor rahmatullāhi alaihi (Silsila Haashamiya)

Aap ke Khulfa :

(1) Hazrat Maulana Abdul Rab (Muradabad )
(2) Hazrat Maulana Nizaam-ud-deen Balyawi (Muradabad)
(3) Hazrat Maulana Mas’ood Hasan (Muradabad)
(4) Hazrat Habeeb-e-Millat Maulana Abdul Tawwaab
(5) Hazrat Allama Aashiq-ur-Rahmān
(6) Hazrat Mufti Mohahammad Aslam (Muzaffarpur)
(7) Hazrat Allama Maulana Mushtaaq Ahmad Nizaami rahmatullāhi alaihi (Allahabad)
(8) Hazrat Maulana Abu Turaab
(9) Hazrat Maulana Abdul Quddoos (Bhadrak)
(10) Hazrat Mufti Sayyed Abdul Aleem Qaadri (Mumbai)
(11) Hazrat Qaari Ne’amatullāh
(12) Hazrat Maulana Abdul Waheed
(13) Hazrat Sayyed Abbaas Alawi Maaliki
(14) Hazrat Maulana Mudaṡṡir Husain Jaybi.

**************
Aap ka wisaal 6 Jamaadi ul awaal 1401 Hijri (13 March 1981 A.D.) Jum’aa ko shaam ko 5 : 45 baje Mumbai me hua.

Aap ka mazaar Dhamnagar, Bhadrak (Odisha) me hai.

************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Mujaahid-e-Millat Maulana Shaah Mohamamd Habeeb-ur-Rahmān rahmatullāhi alaihi aur Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.