Hazrat Qaazi Sayyed Kamaal-ud-deen Ismā’eel Isfahani rahmatullāhi alaihi

47579787_1452701584864361_8607277438013014016_n

Aap ke waalid ka naam Sayyed Burhaan-ud-deen hai.

Aap ke waalid Isfahan (Iran) se Hindustan tashreef laaye aur Ahmedabad (Gujarat) me muqeem hue.

********************
Aap ne apne waalid se aur dusre ulama se ta’aleem haasil ki.

Jab aap ke waalid Bharuch shaher ke qaazi muqarrar hue to Aap apne waalid ke saath Bharuch tashreef le gaye. Aur waalid e maajid ke wisaal ke baad Aap Bharuch ke qaazi muqarrar hue.

****************
Jab Hazrat Shaah e aalam Nandarbaar (Sultanpur) tashreef laaye to Aap ziyarat ke liye tashreef laaye aur un ke mureed hue.

Hazrat ki tawajjoh ne Aap aisa aṡar kiya ke Aap ne qaazi ke ohade ko chhod diya aur durweshi ikhtiyaar karke Hazrat ki khidmat me rehne lage.

Aap ibaadat wa mujaahida me masroof rehne lage.

****************
Ek din Hazrat Shaah e aalam rahmatullāhi alaihi apni khaanqaah me Aayat e kareema ‘Wa sakaahum rabbuhum sharaaban tahoora’ ki tafseer badi gehraai aur wazaahat ke saath bayaan farma rahe the. Haaazireen e majlis mast o be-khud ho rahe the.

Aap ne Hazrat se sawaal kiya ke ‘Huzoor! Is Sharaab (e tahoora) ka khaarij me bhi wajood hai ke phir is se muraad mohabbat e Ilāhi hai? Aur kya is sharaab ka peena zaahir me hoga ya sirf qaabiliyat aur istedaad ka naam hai?’ Sarkaar Shaah e aalam muskurae aur farmaaya ‘Is sharaab ka khaarji wajood bhi hai aur ise zaahir me piya bhi jaa sakta hai.’
Aap ne arz kiya ke ‘Huzoor! Is Sharaab ka peena aalam e na-mumkin me mumkin he ya nahi?’ Hazrat ne farmaaya ke ‘Mumkin hai.’ Aap ne arz kiya ke ‘Huzur! Main ummeedwaar hu ke ek qatra mujhe ata kiya jaaye.’
Hazrat ne farmaaya ke ‘Kuchh raate tahajjud ke waqt mere saath raho.’
Aap ne us par amal kiya aur kuchh raato tak Sarkaar Shaah e aalam ki khidmat me maujood rahe. Phir ek raat us mubarak Sharaab e tahoora ka ek qatra aap ke halq me tapkaaya gaya.

Aap farmaate hain ke ‘Us Sharaab e Tahoora ke sirf ek qatre ki masti ne mujh par Jannat aur Dozakh ke haalat munkashif kar diye.’

****************
Sultaan Mahmood Begda ki iltija par Hazrat Shaah e aalam ne Aap ko Ahmedabad ke Qaazi ka ohada manzoor karne ke liye farmaaya. Aap ne se arz kiya ke ‘Main is shart par qubool karta hu ke ALLĀH ta’ala maut se pehle ye haalaat jo mujhe Aaj haasil hain phir inaayat farmae.’ Hazrat ne farmaaya ke ‘Qaazi saahab! ALLĀH ta’ala ne darkhwaast manzoor farma li hai. Tumhara hashr Masha’ikh aur Fuqara ke saath hoga.’

****************
Aap Hazrat Shaah e aalam Sayyed Siraaj-ud-deen Muhammad rahmatullāhi alaihi ke mureed aur khalifa hain.

Aap ‘Suharwardi Jalaali’ silsila ke shaikh hain.

****************
Aap ka wisaal 28 Rabi ul Awwal ko hua.

Aap ka mazaar Ahmedabad (Gujarat) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Qaazi Sayyed Kamaal-ud-deen Ismā’eel Isfahani rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.