Hazrat Bilal (Radi Allahu Ta’ala Anhu) ka waqia.

Shaam ka zikr aate hi fazail ki taleem sunne walon ke zehnoñ mein Hazrat Bilal (Radi Allahu Ta’ala Anhu) ka waqia taaza ho jata hai jab Huzoor (Sallallahu Alaihi Wa Aalihi Wasallam) ke wisaal ke baad sadma se behaal aap (Radi Allahu Anhu) Madina ki galiyoñ mein yeh kehte phirte ke: “Logon, tumne kahin Rasool Allah (Sallallahu Alaihi Wa Aalihi Wasallam) ko dekha hai to mujhe bhi dikha do.” Phir kehne lage ke ab Madine mein mera rehna dushwaar hai, aur Makka aur Madina ke baad sabse mubarak khitta bilad-e-Shaam ke shehar Halab mein chale gaye.

Taqreeban chheh mah baad aap (Radi Allahu Anhu) ko Huzoor (Sallallahu Alaihi Wa Aalihi Wasallam) ki khwab mein ziyaarat naseeb hui to aap (Sallallahu Alaihi Wa Aalihi Wasallam) farmane lage:

“Ma haazihil jafwah, ya Bilal! Ma aan laka an tazoorana?”
(Halabi, As-Sirah Al-Halabiyyah, 2:308)

“Aye Bilal! Yeh kya bewafai hai? (Tu ne humein milna chhod diya), kya hamari mulaqat ka waqt nahi aaya?”

Khwab se bedaar hote hi oontni par sawar ho kar “Labbayk! Ya Sayyidi Ya Rasool Allah ﷺ!” kehte hue Madina Munawwara ki taraf rawana ho gaye. Jab Madina Munawwara mein daakhil hue to sabse pehle Masjid-e-Nabawi pahunche, jahan aap (Radi Allahu Anhu) ki nigahoñ ne aalam-e-warafatgi mein Huzoor (Sallallahu Alaihi Wa Aalihi Wasallam) ko dhoondna shuru kiya. Kabhi masjid mein talash karte aur kabhi hujron mein, jab kahin na paya to aap (Radi Allahu Anhu) ne Huzoor (Sallallahu Alaihi Wa Aalihi Wasallam) ki qabr-e-anwar par sar rakh kar rona shuru kar diya aur arz kiya:

“Ya Rasool Allah ﷺ! Aap ne farmaya tha ke aakar mil jao, ghulam Halab se bahr-e-mulaqat haazir hua hai.”

Ye kehkar be-hosh ho kar mazaar-e-pur-anwar ke paas gir pade, kaafi der baad hosh aaya. Itne mein saare Madina mein ye khabar phail gayi ke Moazzin-e-Rasool Hazrat Bilal (Radi Allahu Anhu) aa gaye hain.

Madina Tayyiba ke buddhe, jawan, mard, auratein aur bachay ikatthe ho kar arz karne lage: “Bilal! Ek dafa woh azaan suna do jo Mahboob-e-Allah (Sallallahu Alaihi Wa Aalihi Wasallam) ke zamane mein sunate the.”

Aap (Radi Allahu Anhu) ne farmaya: “Main ma’azrat khwah hoon, kyunki main jab azaan padhta tha to ‘Ashhadu anna Muhammadan Rasoolullah’ kehte waqt Huzoor (Sallallahu Alaihi Wa Aalihi Wasallam) ki ziyaarat se musharraf hota aur aap ke deedaar se apni aankhoñ ko thandak pohchata tha. Ab ye alfaaz ada karte waqt kise dekhunga?”

Baaz Sahaba-e-Kiraam (Radi Allahu Anhum) ne mashwara diya ke Hasnain Kareemain (Radi Allahu Anhuma) se sifarish karwai jaye, jab wo Hazrat Bilal (Radi Allahu Anhu) ko azaan ke liye kahenge to wo inkaar nahi kar sakeñge.

Chunanche Imam Hussain (Radi Allahu Anhu) ne Hazrat Bilal (Radi Allahu Anhu) ka haath pakad kar farmaya:

“Ya Bilal! Nashtahi nasma’a azaanak alladhi kunta tu’adhdhin li Rasoolillah (Sallallahu Alaihi Wa Aalihi Wasallam) fil masjid.”
(Subki, Shifa As-Siqam: 239 | Haitami, Al-Jawhar Al-Munazzam: 27)

“Aye Bilal! Hum aaj aap se wahi azaan sunna chahte hain jo aap (hamare nana jaan) Allah ke Rasool (Sallallahu Alaihi Wa Aalihi Wasallam) ko is masjid mein sunate the.”

Ab Hazrat Bilal (Radi Allahu Anhu) ko inkaar ka yaraa na raha, lihaza usi maqam par khade ho kar azaan di jahan Huzoor (Sallallahu Alaihi Wa Aalihi Wasallam) ki zaahiri hayaat mein diya karte the.

Baad ki kaifiyat ka haal kutub-e-seerat mein yun bayan kiya gaya hai:

“Jab aap (Radi Allahu Anhu) ne (ba aawaz-e-buland) Allahu Akbar, Allahu Akbar kaha, Madina Munawwara goonj utha. (Aap jaise jaise aage barhte gaye jazbaat mein izafa hota chala gaya). Jab ‘Ashhadu an la ilaha illallah’ ke kalimat ada kiye to goonj mein mazeed izafa ho gaya. Jab ‘Ashhadu anna Muhammadan Rasoolullah’ ke kalimat par pahunche to tamaam log, hatta ke parda nasheen khawateen bhi gharon se bahar nikal aayeeñ. (Riqt o girya zari ka ajeeb manzar tha). Logon ne kaha: ‘Rasool Allah (Sallallahu Alaihi Wa Aalihi Wasallam) tashreef le aaye hain.’ Aap (Sallallahu Alaihi Wa Aalihi Wasallam) ke wisaal ke baad Madina Munawwara mein us din se zyada rone wale kabhi nahi dekhe gaye.”

(Dhahabi, Siyar A’lam An-Nubala, 1:2358 | Subki, Shifa As-Siqam: 340 | Halabi, As-Sirah Al-Halabiyyah, 3:308)