Shaban Ki 15wi Raat Ya’ani Shab e Bara’at

*15 Shaban ul Muazzam*
*Huzoor Nabi e Kareem ﷺ Ne Irshad Farmaya Jab Nisf Shaaban Ki Ya’ani (15 Shaban) Ki Raat Aaye To Raat Ko Qayaam Ya’ani Ibadat Karo Aur Din Ko Roza Rakho, Beshak Ghuroob e Aaftab Se Subah Sadiq Tak Allah Ta’ala Ki Rehmat Ka Khaas Nuzool Aasman o Duniya Par Hota Hain, Allah Ta’ala Ki Taraf Se Aawaz Di Jaati Hai :- Khabardar! Hai Koi Mujhse Bakhshish Talab Kare Me Use Baksh Du, Hain Koi Rizq Ka Talib Ke Use Rizq Ata Karu, Hain Koi Musibat Zada Ke Me Use Aafiyat Ata Karu, Khabardar, Koi Is Tarah Hai ? Khabardar Koi Is Tarah Hai ? Isi Tarha Ak Aur Hadees Hain Huzoor Nabi e Kareem ﷺ Ne Irshad Farmaya :- Beshak Nisf Shaban Ki Raat Me Allah Ki Rahmat Ka Khaas Zahoor Hota Hai, Allah Apni Tamaam Makhlooq Ko Maaf Farma Deta Hain Siwae Mushrik, Logo Se Bughz Rakhne Wala Aur Dushmani Karne Wale Ke, Huzoor Nabi e Kareem ﷺ Ne Irshad Farmaya Ki:- Allah Ta’ala Shaban Ki 15wi Raat Ko Apni Tamaam Makhlooq Ki Taraf Mutawajjeh Hota Hain Aur Tamaam Makhlooq Ki Maghfirat Farma Deta Hain Lekin Mushrik Aur Bughz (Keena) Rakhne Wala Nahi Baksha Jata, Huzoor Akram ﷺ Ne Irshad Farmaya :- Nisf Shaban Ki Raat Me Saal Bhar Me Paida Hone Wale Aur Faut (Intaqal) Hone Wale Baa’is e Rif’at Naik Aamal Aur Rizq Ke Asbaab Likh Diye Jate Hain, Ek Aur Hadees Hain Huzoor Nabi e Kareem ﷺ Ne Farmaya Jab 15 Shaban Ki Shab Aaye To Usme Ibadat Karo Din Me Roza Rakho, Allah Paak Shaban Ki 15wi Shab Me Tajalli Farmata Hai Istagfar (Tauba) Karne Wale Ko Baksh Deta Hai, Huzoor Nabi e Kareem ﷺ Shaban Ki 15wi Raat Me Aadhi Raat Ko Qabarustan Tashreef Le Jate The, Huzoor ﷺ Ne Irshad Farmaya Jisne 15wi Shaban Ko Roza Rakha Usko Meri Shafa’at Halaal Ho Gayi, Jo Shaks 15wi Shaban Ko Roza Rakhe Use Jahannum Ki Aag Na Chuegi.*

*Shaban Ki 15wi Raat Ya’ani Shab e Bara’at*

Ameer ul Momineen Hazrat Sayyedna Mola Ali Alahis Salam Se Riwayat Hain Ke Huzoor Nabi e Kareem ﷺ Ne Farmaya :- Jab Shaban Ki 15wi Raat (Shab e Bara’at) Aaye To Us Raat Me Qayaam (Ibadat) Karo Aur Uske Din Me Roza Rakho Kyu Ke Allah Is Raat Aasman e Duniya Par Rehmat Ka Nuzool Farmata Hain Aur Irshad Farmata Hain :- Hain Koi Mujhse Maghfirat Chahne Wala ? Ke Me Use Baksh Du, Hain Koi Rizq Maangne Wala ? Ke Me Use Rizq Ata Karu, Hain Koi Kisi Musibat Me Mubtala ? Ke Me Uski Musibat Door Kardu, Hain Koi Aesa ? Hain Koi Aesa ? Yahan Tak Ke Fajar Ka Waqt Ho Jata Hain.

📚 *References* 📚
*1.* Sunan Ibne Majah, Hadees No 1388.
*2.* Mishkat Sharif, Hadees No 1308.
*3.* Umdatul Qari, Jild 11, Safa 82.
*4.* Al Mawahibul Ladunniyah, Jild 3, Safa 300.
*4.* Mirqat, Hadees No 1308.

*Shaban Ki 15wi Raat Ya’ani Shab e Bara’at*

Ummul Momineen Hazrat Sayyeda Aaisha Siddeeqa Salamullah Alaiha Farmati Hain :- Ek Raat Mene Huzoor Nabi e Kareem ﷺ Ko Apne Paas Na Paya To Me Aapko Dhunde Nikli To Jab Me Baqi (Jannat ul Baqi) Pouchi To Aap ﷺ Baqi Ke Qabarustan Me Aasman Ki Taraf Sar Uthaye Hue The To Aap ﷺ Ne Farmaya :- Beshak 15 Shaban (Shab e Bara’at) Ki Raat Allah Azzawajal Duniya Ke Aasman Par Khas Rehmat Ka Nuzool Farmata Hain Aur Banu Kalb (Ek Qabila) Ki Bakriyo Ke Baalo Ke Barabar Bhut Logo Ki Maghfirat Farma Deta Hain.

📚 *References* 📚
*1.* Sunan Ibne Majah, Hadees No 1389.
*2.* Sunan Tirmizi, Hadees No 739.
*3.* Shoibul Imaan, Hadees No 3545.
*4.* Sharah us Sunnah, Hadees No 992, 1299.
*5.* Al Jamius Sageer, Hadees 1667.
*6.* Kanzul Ummal, 35176.

*Shab-e-Bara’at (15th Shabaan) Me Kiye Jaane Waale Amal.*

1. Naaf ke Baal (Pubic hairs) Nikaal Len.
2. Ghusl Karen, Miswak ka Istemaal Karen, Tel, Surmah aur Khushboo Ka Istemaal Karen.
3. Ache Kapde Pehnen, Mumkin ho toh Safeyd Rang ke aur Imamah Baandhen.
4. Suraj Doobne se pehle 40 Martaba “La Hawla Wala Quwwata Illa Billahil Aliyyil Adheem” ka Wird Karen.
5. Maghrib Baad 6 Rakaat Nafil Ada Karen 2 Salaam ke Saath, Surah Yaseen ki Teen Baar Tilawat Karen Ya Kisi Se Sunen.
6. Qabristaan Jaayen.
7. Sadqa O Khairat Karen.
8. Apne Doston aur Rishtedaaron se Muaafi Talab Karen.

Kyun ke Raat Choti hoti hai, Extra Nawafil ada karna Mushkil hoga, Isliye Yeh Amal Karen : – 100 Martaba “SubhanAllah” (100 Hajj ka Sawaab)
– 100 Martaba “Alhamdulillah” (Allah ki Raah me 100 Ghode Dena)
– 100 Martaba “Laa Ilaaha Illallah” (100 Ghulam Azaad Karne ka Sawaab)
– “Allahu Akbar” (Boht hi Faida Dilaane Wala Banega Wo Insaan)
[Mishkat Shareef, Vol.2, page. 346]
– 100 Martaba “Astaghfirullah”
– 313 Martaba “Durood Shareef”
– Ummat ki Maghrifat ki Duwa Karen.
– Isha aur Fajr ki Namaz Ba-Jamaat Ada Karen.Puri Raat Ibadat karne ka Sawaab Milega.
– Surah Dukhan (Para no. 25) ki Tilawat Karen.
– Salaat-ut-Tasbeeh Ada Karen.
– 2 Rakaat Salaat-ut-Tawba Ada Karen aur Sachche Dil se Apne Gunaahon ki Muaafi Talab Karen Sab ke Liye Duwa Karen (Mere Bhi Haq Me Dua Kijiye).