Day: April 2, 2026

Ameer-ul-Momineen Imam Maula Ali (a) ka apni jaagir ko Allah ke liye waqf farmana

Hazrat Umar ne apne daur-e-hukumat mein Yanbu‘ ki zameen Ameer-ul-Momineen Imam Ali (a) ko bataur-e-atiya di. Phir Maula Ali (a) ne us ke ird-gird kai aur zameenein aur cheezein khareed kar us mein shaamil kar li thin. Yanbu‘ ke maqam par mulaazimeen kaam kar rahe the ke wahan pani ka ek chashma phoot pada; woh itna bada tha jaise oont ki gardan ho.

Jab Maula Ali (a) ko is ki khush-khabri di gayi to aap (a) ne is jaagir ko fuqara o masaakeen, fi-sabeelillah, door aur qareeb ke musafireen, aur jang o sulh ke liye sadqa, yani waqf, kar diya—taake us ki jaza us din mile jis din bahut se chehre safed honge aur bahut se siyaah (roz-e-qiyamat), aur taake Allah jahannam ki aag ko un se door kar de aur unhein jahannam ki aag se mehfooz rakhe. (1)

Maula Ali (a) ne apne is sadqa yani waqf ki dastavez mein tahreer farmaya:

“Yeh woh wasiyyat hai jiska Ali bin Abi Talib ne apne maal ke muta‘alliq hukm diya aur faisla kiya. Maine Yanbu‘, Wadi-e-Qura, Azina aur Ra‘d ko Allah ke raaste mein, us ki raza ke liye sadqa kiya. Is ke zariye main Allah ki raza hasil karna chahta hoon. In ki aamdani Allah ke raaste, us ki raza, jang o sulh, mujahideen aur door-qareeb ke rishtedaron ko faida dene wali tamam madon mein kharch hogi. Na yeh bechi jaayegi, na hiba ki jaayegi aur na hi wirasat mein di jaayegi—chahe main zinda rahoon ya na rahoon. Is waqf ke zariye main Allah ki khushnudi aur aakhirat ki kamyabi ka talabgaar hoon. Main Allah Ta‘ala ke siwa aur kuchh nahin chahta. Wohi ise qubool karega aur wohi iska waaris hoga. Yaqeenan wohi behtareen waaris hai. Yeh woh faisla hai jo maine apne aur apne Rabb Allah ‘Azza-o-Jal ke darmiyan apne maal ke muta‘alliq kiya hai.” (2)

Hawale:

1. Sunan al-Bayhaqi, jild 6, safha 160; al-Muhalla, jild 9, safha 180; al-Mughni, jild 5, safha 545


2. Musnad Imam Zayd, safha 180; Musannaf ‘Abd-ur-Razzaq, jild 10, safha 375



Intikhab o Tarjuma: Syed Hasni al-Halabi