Sahaba ne 12 Rabi ul Awwal ko aisa Jashn manaya ke misaal nahi milti!
Hadees Sahih Bukhari aur Muslim
“Jab Allah Ta’ala ne Apne Mehboob ki Wiladat ka Faisla kiya to Din Muntakhab kiya Peer (Monday) aur Tarikh muntakhab ki 12 Rabi ul Awwal. Aaqa SallAllahu Alaihi wa Aalihi wa Sallam ki Zaat me 4 waqt aaye Khaas! Ek Huzoor ki Wiladat ka, Ek fir Gaar-e-Hira me Huzoor ki Baysat ka ja Quran utra. Teesra fir Hijrat-e-Madina ka aur Chowtha fir Huzoor ki Wafaat aur Wisaal ka. Qurban jaau Maula Teri Hikmato par! Log samjhne se kaasir hain! Rabb-e-Kainat ne jab Mustafa ke Milad ka Faisla kiya to Din 12 Rabi ul Awwal ka rakha aur Peer ka rakha. Aur jab Mustafa par Wahi utaari aur Gaar-e-Hira me Hum Kalaam hua wo din bhi Peer ka rakha! Jab Mustafa ne Hijrat ki aur Madina daakhil hue to Madina me daakhil hone ka din bhi Peer ka 12 Rabi ul Awwal ki Taarikh hai!
Milad bhi 12 Rabi ul Awwal aur Peer ka Din aur Aamad-e-Madina bhi Peer ka Din aur 12 Rabi ul Awwal aur 63 baras ke baad jab Wisaal ka Waqt aaya, Wisaal ke waqt keliye bhi Peer ka Din aur 12 Rabi ul Awwal. Mai aapke zehano se sawal karta hun, kya ye sab ek ittefaaki amal (coincidence) hai? Ittefakan 12 Rabi ul Awwal ko Paida hue? Aur ittefakan he Hijrat-e-Madina Peer aur 12 Rabi ul Awwal ko hui? Kya ittefakan Wisaal bhi 12 Rabi ul Awwal wohi Peer ka Din? Ek he Din aur Ek he Mahina aur Ek he Tarikh! Isse aage batadun?
Jab Madina Pahunche to Imam Bukhari Sahih Bukhari me likhte hain Peer ka Din 12 Rabi ul Awwal tha, din tulu hochuka tha aur Imam Muslim riwayat karte hain din chadha nahi tha abhi raat khatam horahi thi. Maine is par Sharah likhi apni kitab me, mai Bukhari aur Muslim ki riwayato ko jama karta hun.Imam Bukhari ne kaha, Imam Asqalani ne kaha, Imam Suhaili ne kaha, Hafiz Ibne Kaseer ne kaha, Allama Ibnul Kayyum ne kaha, Ibne Ra’ja Hanbali ne kaha, Imam Qustulani ne kaha, Imam Aini ne kaha. Har ek ne ittefaq kiya Mujtamahu Alaih ke muttafaq alaih (yaani sab is baat ko maante hain) ke ek baat hai ke Aaqa SallAllahu Alaihi wa Aalihi wa Sallam jab Madina me aaye to 12 Rabi ul Awwal ki Tarikh aur Peer ka Din tha. Ab sawal hua Imam Bukhari ne kaha 12 Rabi ul Awwal ka Din tha, Imam Muslim ne kaha raat guzar rahi thi abhi din chadh raha tha, maine dono riwayato ko jama kardiya, Haq ye hai ke na raat rahi thi na din aaya tha, 11-12 ki darmiyani raat jaarahi thi, 12 Rabi ul Awwal ka Din aaraha tha, ye waqt isliye jama kiya ke jab Mustafa ka Noor Sayyeda Aamina Salamullahi Alaiha ki Goudh me Aaya, raat jaarahi thi 12 ka Din aaraha tha! Mahina bhi Wohi tha, Tarikh bhi Wohi thi, Din bhi Wohi tha, Waqt bhi Wohi tha! Aur jab Wisaal hua fir Wohi Din Peer ka aur Wohi Raat 12 Rabi ul Awwal ka Din.
Sawal paida hota hai Ye Ittefaq kyu? Rabb-e-Kainat ko Malum tha Mere Mehboob ki ummat me 2 tarah ke zouq ke log honge, 2 kismo ke zouq ke log honge. Har koi apne apne tarik par Mehboob se Mohabbat karta hoga, ilmi ikhtelaaf hoga, ab ye mai apni ek wijdaani, tozihi, tatbiki baat kehraha hun, Wiladat aur Aamad-e-Madina ko is liye Ek Din Ek Tarikh Ek Waqt me jama kiya, isliye ke jab Huzoor Madina aaye, Madine ki aurato chaton pe chadh gayi, bache galiyon me aagaye, jawan bahar nikal aaye! Uthaiye Sahih Bukhari Baab-o-Maktabin Nabi aur uthaiye Sahih Muslim Baabul Hijrat-e-Madina, Bukhari aur Muslim me hai Madine ke log chaton pe chadh gaye, galiyan bhar gayi, Shehar-e-Madina logo se bhar gaya, aurato ne Dafe haath me utha lin aur jab Mustafa ki Aamad hui Juloos nikle “Yunaduna Ya Muhammadu Ya RasoolAllah!” Gali gali me Ya Muhammadu Ya RasoolAllah ke Naare lag rahe they! Idhar Juloos nikal rahe they, idhar aurate bachhiyan Daf bajakar gaarahi thin:
“Tala al Badru Alaina, Min Sani Ya til Wedayi
Wajabat Shukru Alaina, Ma’da’aa Lilla Hidayi!”
Har taraf nagmo ki aawaz aarahi thi, gunj thi, dafey baj rahi thin! Arey aage chalo Habshi Sahaba aagaye! Abu Dawood Shareef uthaiye, Imam Asqalani ki Fathul Baari uthaiye, Sahaba Habsha se aagaye, Unhone Daf utha liye aur Aamad-e-Mustafa pe Khuda ki Qasam Naachne lag gaye! Raqs karne lag gaye! Aur fir Us Yaad me har saal, Bukhari Muslim Ibne Hibban Baazar Tabrani Bayheqi har ek me aata hai ke har saal Aamad-e-Mustafa ki Yaad me Habshi Sahaba Masjid-e-Nawabi me aake Raqs karte they! Raqs karne lage aur Apni Habshi Zubaan me taraane padhte they, Huzoor ne pucha kya kehte hain, Sahaba ne arz kiya: “Muhammadun Abdun Swaleh, Muhammadun Abdun Swaleh, Muhammadun Abdun Swaleh!” Is behar me tarana gaate! Wo Naach rahe they! Aaage chale Bayheqi Shareef me hai Banu Najjar ke kareeb Hazrat Abu Ayyub Ansari RadiAllahu Anhu ke Ghar Utre to bachhiya aayi aur gaane lagi ke
“Khush Nasib hain Hum ke Musfata hamare Padosi hogaye!” Daf bajake gaarahi thin, Hadees me hai Huzoor Khade hogaye, Farmaya Kyu gaarahi hon kyu baja rahi ho? Unhone kaha Khuda ki Qasam! Huzoor hum Aapse Muhabbat karti hain. Allah ki Izzat ki Qasam Hadees me hai Tajdar-e-Kainat ne Jawab diya: “Allah Gawah Hai tum Mujhse Muhabbat karke ye gaarahi ho, Mera Dil Muhammad ka Dil tumse Muhabbat karta hai!”
To Allah ko Maalum tha 2 zouq honge, kuch log to 12 Rabi ul Awwal ko Huzoor ke Milad ka Din samjhkar Manaenge aur Jashn karenge isliye 12 Rabi ul Awwal unke liye Youm-e-Milad rahe aur wo Milad ka Jashn manate rahe! Aur ye bhi Maalum tha ke kuch log aise hone apni tabiyat aur ilmi zouq ki wajah se Jahsn bator-e-Milad nahi manaenge. Agar bator-e-Milad na manayen to Aamad-e-Madina ka Jashn Sahaba ne Manaya tha wo Sahaba ki Sunnat samjhkar he mana lenge.
12 Rabi ul Awwal he ko Wiladat ho aur 12 Rabi ul Awwal he ko Madina Pak ke Ansaar, Habashi, Sahabiyat aur Sahaba Jashn manaye, Raqs kare, Gaaye, to Ye Sunnat-e-Sahaba-e-Madina ho. To farmaya ke logo Mere Mehboob ka Din hai 12 Rabi ul Awwal! Jahsn Manaya karo, jee chahe to Milad Samjhke manao, jee chahe to Sunnat-e-Aamad-e-Madina, Sunnat-e-Sahaba samjhkar manao MAGAR JASHAN MANAO 12 Rabi ul Awwal par! Allah ne sab taarikhe jama kardi!
Aur Wisaal ka Din bhi 12 ko rakha aur wo isliye ke Us Wisaal ke Din ka gum Nahi ke Huzoor ne farmaya “Hayati wa Mamati Khairul Lakum”, Maut auro keliye hoti hai Mai Wisaal ke Baad bhi Zinda Hun aur Qayamat tak Zinda Hun aur Ummat ke Durood-o-Salaam Mujhpar pesh hote hain Unka Jawab Deta Hun aur Shafa’at karta Hun aur Aaqa SallAllahu Alaihi wa Aalihi wa Sallam ne farmaya: “Allah ne zameen par haram kiya hai ke Nabiyo ke Jismo ko khaaye! To Wisaal Huzoor keliye tha ke Allah se Mulaqat hui aur Wiladat aur Milad ummat keliye tha ke Allah ki Naymat Nasib hui!”
SallAllahu Alaihi wa Ala Aalihi wa Sahbihi wa Baarik wa Sallim
-Shaykh-ul-Islam Dr. Tahir-ul-Qadri
Allahumma Salle Ala Sayyedina wa Maulana Muhammadiw wa Ala Aalihi wa Sahbihi wa Baarik wa Sallim
Allahumma Salle Ala Sayyedina wa Maulana Muhammadi Nin Nabiyyil Ummiyyil Habibil Aalil Qadril Azeemil Jaahi wa Ala Aalihi wa Sahbihi wa Baarik wa Sallim
Aal-e-Qutub Aal-e-Syed Abdullah Shah Ghazi 