Tazhkira-e Imam Hasan Al-Mujtaba ‘Alayh-is-Salam

Aap ‘Alayh-is-Salam Baara A’immah Me Se Dusre Imam Hain. Aap ‘Alayh-is-Salam Ka Naam Naami Isme Girami : “Hasan” Kunyat : “Aboo Muhammad” Alqabat : “Taqi, Zaki, Sayyid Mujtba, Shabihe Rasool” Wagaira Hain.

Hazrat Imam Hasan ‘Alayh-is-Salam Kee Wildate Ba-Sa’adat Hijrat Ke Teesre Saal 15 Ramdan-ul-Mubarak Ko Madinah Munawwarah Me Huwi. Huzoor Rahmat-E-Aalam SallAllahu Ta’ala ‘Alayhi Wa Aalihi Wa Sallam Ne Hazra Imam Hasan ‘Alayh-is-Salam Kee Wiladat Se Phele Hazrat Ummi Salamah Aur Hazrat Asma’ Binte Umays RadiyAllahu Ta’ala ‘Anhuma Ko Hukm Diya Ki Tum Ne Meri Beti Fatimah Ke Paas Rehna Hai Aur Jab Un Ke Haa’n Baccha Paida Ho Jaaein To Mujhe Khabar De Dena. Mere Aane Tak Koi Kaam Na Karna. Chunanche Huzoor Nabiyye Karim SallAllahu Ta’ala ‘Alayhi Wa Aalihi Wa Sallam Tashrif Farma Huwe Aur Apna Lu’aab Dahan Mubarak Hazrat Imam Hasan ‘Alayh-is-Salam Ke Moonh Mubarak Me Daala Aur Phir Ye Du’aa Farmayi : Aye Allah! Mein Is Ko Teri Panaah Me Deta Hoo’n Aur Is Kee Aulaad Ko Bhi Us Shaytaan Ke Sharr Se Jo Teri Bargah Se Raanda Gaya Hai.

Nabi Karim SallAllahu Ta’ala ‘Alayhi Wa Aalihi Wa Sallam Ne Aap Ka Naam “Hasan” Rakha. Wiladat Ke Saatwe Din Aap Ka Aqiqa Kiya, Baal Mundwaein Aur Hukm Diya Ki Baalo’n Ke Wajn Ke Barabar Chaandi Sadqa Kee Jaaein. Hazrat Imam Hasan ‘Alayh-is-SalamShakal Wa Soorat Me Sar Se Le Kar Paaun Tak Khwaja-E-Kawnayn Muhammad Mustafa SallAllahu Ta’ala ‘Alayhi Wa Aalihi Wa Sallam Ke Mushaabeh They. Hazrat Aboo Bakar RadiyAllahu Ta’ala Anhu Se Riwayat Hain : Nabiyye Akram SallAllahu Ta’ala ‘Alayhi Wa Aalihi Wa Sallam Sahaba Ko Namaz Padha Rahe They Aur Jab Aap Sajde Me Jaate To Hazrat Hasan Bin Ali Aap Kee Pushte Mubarak Par Khel Rahe Hote Kai Dafa Aisa Huwa, Sahaba Ne Arz Kiya : Hum Ne Aap Ko Ye Mu’amala Kisi Aur Se
Karte Huwe Nahin Dekha, Farmaya : Mera Yeh Beta Sardar Hain Anqareeb Allah Ta’ala Is Ke Zari’e Musalmano’n Ke Do Azim Giroh Me Sulh Karwaega. Aap ‘Alayh-is-Salam Ke Zamana-E-Khilafat Me Aik Aadami Ne Namaaz Kee Haalat Me Aap Par Hamla Kar Diya Aur Sajde Me Aap Par Khanzar Ka Waar Kiya. Aap Ne Khutba Farmaya : Aye Ahle Iraq Hamaare Baare Me Allah Ka Taqwa Ikhtiyaar Karo. Hum Aap Ke Ameer Aur Mehmaan Bhi Hain. Aur Hum Woh Ahl-E-Bayt Hain Jin Ke Muta’alliq Allah Ta’ala Ne Farmaya Hai : إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا Aap Is Aayat Ko Baar Baar Padhte Rahe Yaha’n Tak Ki Tamam Ahle Masjide Ro Pade.”
–
[Ibn Hajar Makki Fi As-Sawa’iq Al-Muhriqah ‘Ala Ahl Al-Rafd Wa Al-Dalal Wa Al-Zandaqah, Shablanji Fi Noor-ul-Absar Fi Manaqibi Aali Bayt-in-Nabiyy-il-Mukhtar, Al-Sharaf Al-Mu’bbad Li-Al-Muhammad, Jami’ Fi Shawahid-un-Nubuwwah.]

Faza’il-o-Manaqib Amir Al-Mu’minin Hazrat Imam Hasan Al-Mujtaba ‘Alayh-is-Salam

“Hzrat Abd-ul-Allah Bin Abbas رَضِىَ اللهُ تَعَالىٰ عَنْهُمَا Se Riwayat Hai Ki Huzoor Nabiyy-E-Akram صَلَّى اللهُ تَعَالىٰ عَلَيْهِ وَآلِهِ وَسَلَّمَ Ne Farmaya : Aye Logo’n! Kya Mein Tumhein Un Ke Baare Me Khabar Na Doo’n Jo (Apne) Naana-Naani Ke I’tibaar Se Sab Logo’n Se Behtar Hain ? Kya Mein Tumhein Un Ke Baare Me Na Bataaun Jo (Apne) Chacha Aur Phuphi Ke Lihaaz Se Sab Logo’n Se Behtar Hain? Kya Mein Tumhein Un Ke Baare Me Na Bataau’n Jo (Apne) Maamoo’n Aur Khaala Ke I’tibaar Se Sab Logo’n Se Behtar Hain? Kya Mein Tumhein Un Ke Baare Me Khabar Na Doo’n Jo (Apne) Maa Baap Ke Lihaaz Se Sab Logo’n Se Behtar Hain? Woh Hasan Aur Husayn Hain, Un Ke Naana Allah Ke Rasool, Un Kee Naani Khudayjah Bint Khuwayld, Un Kee Waalidah Fatimah Bint RasoolAllah , Un Ke Waalid Ali Bin Abi Talib, Un Ke Chacha Ja’far Bin Abi Talib, Un Kee Phuphi Ummi Haani Bint Abi Talib, Un Ke Maamoo’n Qaasim Bin RasoolAllah Aur Un Kee Khaala RasoolAllah Kee Betiya’n Zaynab, Ruqayyah Aur Ummi Kulthum Hain. Un Ke Naana, Waalid, Waalidah, Chacha, Phuphi, Maamoo’n Aur Khaala (Sab) Jannat Me Honge Aur Woh Dono’n (Hasanayn Karimayn) Bhi Jannat Me Honge.”
–
[Tabarani Fi Al-Mu’jam-ul-Kabir, 03/66, Raqam-2682.]

“Hazrat Abd-ul-Allah Bin Abbas RadiyAllahu Ta’ala ‘Anhuma Se Marfu’an Hadith Marwi Hai Ki Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Ne Farmaya : Mein Darakht Hoo’n, Fatimah Is Kee Tehni Hai, Ali Is Ka Shagufah Aur Hasan Wa Husayn Is Ka Phal Hain Aur Ahl-E-Bayt Se Muhabbat Karne Waale Is Ke Patte Hain, Yeh Sab Jannat Me Honge, Yeh Haque Hai Haque Hai.”

Is Hadith Ko Imam Daylami Ne Riwayat Kiya Hai.
–
[Daylami Fi Musnad-ul-Firdaws, 01/52, Raqam-135.]
“Hazrat Anas Bin Maalik RadiyAllahu Ta’ala Anhu Farmate Hain Ki Mein Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Kee Bargahe Aqdas Me Haazir Hota Ya (Farmaya) Aksar Awqaat Haazir Hota (Aur Dekhta Ki) Hasan Wa Husayn عليهما السلام Aap SallAllahu Ta’ala ‘Alayhi Wa Aalihi Wa Sallam Ke Shikam Mubarak Par Lot-Pot Ho Rahe Hote Aur Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Farma Rahe Hote : Yeh Donon Hee To Meri Ummat Ke Phool Hain.”

Is Hadith Ko Imam Nasa’i Ne Riwayat Kiya Hai.
–
[Nasa’i Fi As-Sunan-ul-Kubra, 05/49, 150, Raqam-8167, 8529.]
“Hazrat Ali RadiyAllahu Ta’ala Anhu Riwayat Karte Hain Ki Hazrat Hasan Seena Se Sar Tak RasoolAllah SallAllahu Ta’ala ‘Alayhi Wa Aalihi Wa Sallam Kee Kaamil Shabih They Aur Hazrat Husayn Seena Se Neeche Tak Huzoor SallAllahu Ta’ala ‘Alayhi Wa Aalihi Wa Sallam Kee Kaamil Shabih They.”

Is Hadith Ko Imam Tirmidhi Aur Ahmad Ne Riwayat Kiya Hai Aur Imam Tirmidhi Ne Farmaya Ki Yeh Hadith Hasan Sahih Hai.
–
[Tirmidhi Fi As-Sunan, 05/660, Raqam-3779,

Ahmad Bin Hanbal Fi Al-Musnad, 01/99, Raqam-774.]

“Hazrat Aboo Sa’iyd Khudri رَضِىَ اللهُ تَعَالىٰ عَنْهُ Se Riwayat Hai Ki Huzoor Nabiyy-E-Akram صَلَّى اللهُ تَعَالىٰ عَلَيْهِ وَآلِهِ وَسَلَّمَ Ne Farmaya : Hasan Aur Husayn Jannati Jawaano’n Ke Sardaar Hain.”
–
[Tirmidhi Fi Al-Jami’ As-Sahi, 05/656, Raqam-3768.]

“Hazrat Abd Allah Bin Mas’ood رَضِىَ اللهُ تَعَالىٰ عَنْهُمَا Riwayat Karte Hain Ki Huzoor Nabiyy-E-Akram صَلَّى اللهُ تَعَالىٰ عَلَيْهِ وَآلِهِ وَسَلَّمَ Ne Farmaya : Jis Ne Mujh Se Muhabbat Kee, Us Par Laazim Hai Ki Who In Dono’n Se Bhi Muhabbat Kare.”
–
[Nasa’i Fi As-Sunan-ul-Kubra, 05/50, Raqam-8170.]
“Hazrat Ali Bin Abi Talib كَرَّمَ للهُ تَعَالىٰ وَجْهَهُ الْكَرِيْم Bayan Karte Hain Ki Huzoor Nabiyy-E-Akram صَلَّى اللهُ تَعَالىٰ عَلَيْهِ وَآلِهِ وَسَلَّمَ Ne Hasan Aur Husayn عَلَيْهِمَا السَلَام Ka Haath Pakdada Aur Farmaya : Jis Ne Mujh Se Aur In Dono’n Se Muhabbat Kee Aur In Ke Waalid Se Aur In Kee Waalidah Se Muhabbat Kee Woh Qiyaamat Ke Din Mere Saath Mere Hee Thikaane Par Hoga.”

Is Hadith Ko Imam Tirmidhi Aur Ahmad Ne Riwayat Kiya Hai Aur Imam Tirmidhi Ne Farmaya Ki Yeh Hadith Hasan Hai.
–
[Tirmidhi Fi Al-Jami’ As-Sahi, 05/641, Raqam-3733.]

“Hazrat Abd Allah Bin Mas’ood رَضِىَ اللهُ تَعَالىٰ عَنْهُمَا Se Riwayat Hai Ki Huzoor Nabiyy-E-Akram صَلَّى اللهُ تَعَالىٰ عَلَيْهِ وَآلِهِ وَسَلَّمَ Hasanayn Karimayn عَلَيْهِمَا السَلَام Paas Aap صَلَّى اللهُ تَعَالىٰ عَلَيْهِ وَآلِهِ وَسَلَّمَ Kee Pusht Mubarak Par Sawaar Ho Gaye. Logo’n Ne Un Ko Man’a Kiya To Aap صَلَّى اللهُ تَعَالىٰ عَلَيْهِ وَآلِهِ وَسَلَّمَ Ne Farmaya : In Ko Chhod Do, In Par Mere Maa’n Baap Qurbaan Ho’n.”
–
[Tabarani Fi Al-Mu’jam-ul-Kabir, 03/47, Raqam-2644,
03/47, Raqam-2644,

Maraja-‘l-Bahrayn Fi Manaqibi-’l-Hasanayn ‘Alayhima-‘s-Salam,/74, Raqam-85.]

Aap ‘Alayh-is-Salam Kee Shahadat 05 Rabi-ul-Awwal San 49 Hijri Me Zehr Khuraani Ke Sabab Hu’i, Aap Kee Muddate Hayaat 46 Saal Hain Aur Aap Ka Madfoon Jannat-ul-Baqi’ Madinah Munawwarah Me Hain.