MUHABBAT AQD-E-QALBI HAI!!
“Sahih Bukhari ki Hadees hai ek Shakhs tha gunah-e-kabeera ka murtakib jise gunah ke baees saza di jati thi (hadd jaari hoti thi). Bar bar wahi gunah karta bar bar wahi saza di jati. Sahaba-e-Kiram ne uska haal dekhkar ke bar bar saza hone ke bawajood gunah se rukta nahi, us shakhs par lanat bhejdi. Mere Aaqa ne andar aawaz sunli ke Sahaba Uspar lanat bhej rahe hain. Aaqa SallAllahu Alaihi wa Aalihi wa Sallam baahar nikal aaye aur farmaya: Uspar lanat na bhejo, Innahu Yuhibbullah wa Rasoolah, wo Allah Ta’ala aur Mujhse Muhabbat karta hai.
Ab Muhabbat kaaheki Allah aur Uske Rasool (SallAllahu Alaihi wa Aalihi wa Sallam) se? wo shakhs to nafarmani par saza bhugat raha hai bar bar usko kodey lagte hain. Bar bar gunah aur kodey khane ke bawajood Aaqa farmate hain Muhabbat karta hai Allah Rasool se.
Allah ki Muhabbat to samjhme aagayi ke gunah karraha hai aur fir Imandari se kodey kharaha hai, par Huzoor se Muhabbat kya hai? Ye Sahih Bukhari ki Hadees hai, iski tamam shuruh uthake dekhiye, Asqalani ko padhiye, Ayni ko padhiye, deegar kutub ko padhiye qudama ko aur Muslim ke andar Imam Qurtabi se lekar niche tak Imam Bagawi, Imam Nawawi aur Qazi Ayaz tak sabko padhiye, aapko pata chalega wo jo Aaqa SallAllahu Alaihi wa Aalihi wa Sallam ne ishara kiya ke Allah Rasool se Muhabbat karta hai, wo Muhabbat kya thi!
Uske amal to aapke saamne aagaye ke gunah ke baais kodey lagrahe hain, jisey dekhkar Sahaba ne uspar lanat bheji aur Huzoor ne farmaya Nahi Khabardar lanat na bhejo Uske Dilme Meri Muhabbat hai.
Ab aao zara trace karte hain wo Muhabbat kya thi, Qutub-e-Hadees ki Shuruh (Tafseel) me aaya hai, Muwatta Imam Malik ki shuruh me hai, Shuruh-e-Bukhari me hai, Shuruh-e-Muslim me hai, uthake dekhiye Uske ahwaal Asma ur Rijal ki kitabo me.
Us Shakhs ki Muhabbat ka bus ye tha ke Wo Aaqa (SallAllahu Alaihi wa Aalihi wa Sallam) ki Majlis me baitha rehta tha aur jab din bhar dekhta tha ke Aaqa (SallAllahu Alaihi wa Aalihi wa Sallam) thak gaye hain, har aane waala apne dukhde, gum ki baate sunata hai Huzoor (SallAllahu Alaihi wa Aalihi wa Sallam) ko. Aaqa (SallAllahu Alaihi wa Aalihi wa Sallam) sabka bojh uthate hain aur saara din subho se shaam tak Ummat aur insano ke dukho ke kisse sunte aur hal farmate hain. Jab dekhta tha ke thak gaye hain, to wo koi lateefa (joke) suna deta tha taake Huzoor Hans pade!
Logo isko Aqd-e-Qalbi (Dil ka Rishta) kehte hain, aamaal me kamzor tha magar ek dil ka Ishqo Muhabbat tha ke baitha rehta tha Huzoor ko hasaane keliye! Ke jab dekhe Chehra-e-Pak pe thakawat ke aasaar aaye, koi lateefa suna diya aur sunake Huzoor ko Hasa diya. Bus Has pade Mere Aaqa to Wo samjhta tha ke chalo bojh utar gaya hai. Uska amal ye tha ke Allah aur Rasool Muhabbat karta hai ke wakfe wakfe se Huzoor ko Hasaata tha! Aur ye hasaane ka kaam siwaye Qalbi Muhabbat (Dilse Muhabbat) ke koi aur nahi karta.
Aur dusri Tafseel uske aamal ki, maine kul shuruh, saikdo kutub khangaali is Hadees ki Sharah me ke mai talash to karu Uski Muhabbat kya thi.
Aur ek dusra sabab nikla Uski Muhabbat ka wo bhi sunlijiye, baahar jata tha safar par kaam kaaj keliye, to waapis aate hue Aaqa SallAllahu Alaihi wa Aalihi wa Sallam keliye shehad aur paneer le aata tha ke Aaqa pasand karte hain. Aake Huzoor ko dedeta, aur paise Uske paas palle koi nahi hote they, tha kangal, Shehad aur Paneer udhaar le aata tha magar Aaqa ko dedeta. Ye Uski Muhabbat thi jisko farmaya Innahu Yuhibbullah wa Rasoolah.
Aur jab pichle jinse udhaar leke kharidke laata tha shehad aur paneer, jab wo paise mangne keliye aate, to jisse udhar leta usko leke Huzoor ki Bargah me aajata. Kehta Ya RasoolAllah ye udhar Maine uthaya tha shehad paneer keliye, ye udhar wapis lene aagaya. Aaqa puchte to Mere paas kyu laaye ho? Kehta Huzoor Shehad Paneer Aapko diya tha! Ye bhi pata tha mere Aaqa Kareem hain. To Aaqa mere paas to paise koi nahi Aap he deden. Fir shehad aur paneer bin mange bhi la deta aur adaegi bhi karze ki Huzoor se karwata. To Huzoor uske amal ko dekhke roz Hans padte, is tarah ki baato se Huzoor ko Hansata rehta tha! Is Amal par Mere Aaqa ne farmaya Innahu Yuhibbullah wa Rasoola!!
Arey Muhabbat ke koi paimaane hote hain? Koi naap tol hota hai ke kitne nafl padhta hai kitne roze rakhta hai kitni Tilawat karta hai?
MUHABBAT AQD-E-QALBI HAI!!
Majnu se pucho muhabbat kise kehte hain, wo kutte ke qadam chum raha tha, kisine kaha kutte ke paao kyu chumte ho insan hokar? Usne kaha tum isey sirf kutta dekhte ho? Ye Laila ki gali me se guzarta hai subho shaam, mai chumta iske paao hun dhyan Laila ki gali ka karta hun!
Allahumma Salli ala Sayyedina wa Maulana Muhammadiw wa Ala Aalihi wa Sahbihi wa Baarik wa Sallim
Aal-e-Qutub Aal-e-Syed Abdullah Shah Ghazi 