Hazrat Sayyed Muhammad Ghauṡ Qaadri rahmatullāhi alaihi

46488304_1444625732338613_8473677412209524736_n

Alqaab :
‾‾‾‾‾‾‾‾
Ghauṡ-e-Zamaan, Qudwat-us-Saalikeen, Zuhrat-ul-Arifeen, Shaikh-ul-Muhaddeeṡeen.

****************
Aap ki wilaadat 1084 Hijri (1673 A.D.) me Peshawar me hui.

Aap ke waaild ka naam Hazrat Sayyed Hasan Baadshaah Saahib bin Sayyed Abdullāh Shaah Ashaabi rahmatullāhi alaihi hai.

Aap Hasani saadaat hain aur Hazrat Ghauṡe aazam Abdul Qaadir Jeelaani radiy-Allāhu ta’ala anhu ki nasl se hain.

****************
Aap ne ibtidaai ta’aleem apne waalid se haasil ki.
Jab Aap ki umr 7 saal ki hui tab aap ne Qur’an hifz karne ke liye bahot koshish ki. Magar jab na ho saka to aap ke waalid ne Ghauṡe aazam Abdul Qaadir Jeelaani radiy-Allāhu ta’ala anhu ki baargaah me istegaaṡah pesh ki. Ghauṡe aazam ke waseele se ALLĀH ta’ala ne apna fazl ata kiya.

Jab 18 saal ke hue to Aap beshumaar uloom ke maahir ho gaye.

****************
Aap ne Kabul jaakar Ulama aur Soofiya se faiz haasil kiya.

Is ke baad aap ke waalid ne Aap ko Tasawwuf ki ta’aleem ata ki.
Aur Aap apne waalid ke mureed hue.

Phir Aap ne Uzla ikhtiyaar kiya aur 4 baar Chilla kiya.
Is ke baad Aap ne 6 saal tak ek hi jagah par Mujaahida aur Muraaqaba kiya.

Is ke baad Aap ke waalid ne Aap ko khilaafat ata farmai.

***********************
Aap akṡar safar karte rehte.

Kuchh arse tak Aap Haafiz Abdul Ghafoor Saahib ki sohbat me rahe.
Phir Pathwar jaakar Shaah Chiraagh Saahib se faiz haasil kiya.
Aap ne Sayyed Faqeer Shaah (Attock), Hazrat Jee Baba Sarkaar Naqshbandi, Miyan Noor Muhammad Saahib, Shah Muhammad Faazil Saahib, Shaah Abdul Lateef Baari Imaam Sarkaar aur Hazrat Miyan Meer Saahib se bhi mulaaqaat karke faiz haasil kiya.
Aap ne Ajmer jaakar Khwaja Moeen-ud-deen Hasan Chishti rahmatullāhi alaihi ke mazaar par jaakar faiz haasil kiya.
Is ke baad Aap Kashmir bhi gaye.

Jab Aap ki mulaaqat Mughal baadshaah Auranzeb Aalamgeer se hui to unho ne Aap ko jaagir aur heere jawaahiraat diye. Aap ne in sab ko lene se inkaar kiya aur farmaaya ke in sab cheezo ko ghareebo aur mohtaajo ki madad ke liye istemaal karna chaahiye.

Lahore me Muhammad Shaah Baadshaah Rangeela akṡar Aap ki mulaaqaat ke liye aate.

****************
Karaamat :
‾‾‾‾‾‾‾‾‾‾‾‾‾
Jab Aap Lahore ke safar par the tab raaste me Attock ke maqaam par ek Saadhu apne saathiyo ke saath aap se milne aaya. Us ke Sona banaane ka qimiya tha. Wo saadhu wo qimiya Aap ko dena chaahta tha taake aap sona banaakar aap ki baargaah me aane waale logo ke liye khaane ka intazaam kar saken.
Aap ne us qimiya ko lekar nadi me phenk diya. Yeh dekhkar wo saadhu naraaz ho gaya. Ye dekhkar aap ne nadi ki taraf ishaare kiya to foran nadi me se bahot saara sona nikalna jaari ho gaya.
Ye karaamat dekhkar wo saadhu apne saathiyo ke saath musalaman ho gaya.
Aur baad me Aap ne use khilaafat bhi ata farmai.

****************
Aap apne mureedo ko 4 baato ki naseehat karte :
(1) ALLĀH ke siwa kisi ka khauf na rakho.
(2) Hamesha ALLĀH ta’ala ki Ibaadat karte raho.
(3) Hamesha Shariat ke paaband bano.
(4) Hamesha hudood e Shariat ki hifaazat karo.

****************
Aap (apne waalid) Hazrat Sayyed Hasan Baadshaah Qaadri rahmatullāhi alaihi ke mureed aur khalifa hain.

Aap ke khulfa :
(1) (Aap ke saahabzaade) Hazrat Shaikh Budh Abdullāh rahmatullāhi alaihi,
(2) Hazrat Akhund Haafiz Abdul Azeez Dehlawi rahmatullāhi alaihi

****************
Aap ka wisaal 17 Rabi ul awwal 1152 Hijri (23 June 1739 A.D.) ko hua.

Aap ka mazaar Delhi Darwaaza, Lahore (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Muhammad Ghauṡ Qaadri rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.