Hazrat Khwaja Uṡmaan Damani rahmatullāhi alaihi

32544054_1273249069476281_454120326863781888_n
Aap ki wilaadat 1244 Hijri (1828/1829 A.D.) me Luni (Kulachi, Dera Ismāeel Khan) me hui.

Aap ke waalid ka naam Maulana Muhammad Moosā Jaan bin Mulla Ahmad Jaan rahmatullāhi alaihi hai.

Aap Afghanistan ke Durrani qabeele ke Achakzai giroh se ta’alluq rakhte hain.

Aap ke pardaada Qaazi Shams-ud-deen Ahmad Shaah Abdaali ke zamaane me Qaazi the.

Aap ki umr 5-6 saal ki thi tab Aap ke waalid ka intiqaal hua. Is ke baad Aap ke maamu Maulana Nizaam-ud-deen ne Aap ki aur Aap ke bhai Maulana Muhammad Saeed parwarish ki aur ta’aleem wa tarbiyat ki.

****************
Aap bahot kam khaana khaate the.
Ek martaba ek mahine ke safar ke dauraan aap ne sirf aadha kilo anaaj khaaya. Magar Aap bilkul tandurast nazar aate the. Logo ko ye dekhkar ta’aajub hua.

****************
Aap Saahib e Kashf the.

(1) Ek martaba Maulana Husain Ali ke dil me ye khayaal aaya ke Auliya Allāh ke paas haqeeqat me Ilme ghaib hota hai aur agar hota hai to kaise hota hai? Ye sochte hue wo Hazrat ki baargaah me pahunche. Hazrat us waqt kuchh Pashtun logo ke saath Pashto zabaan me guftagu kar rahe the. Maulana Husain Ali un logo ke pichhe jaakar baithe. Hazrat ne Maulana Husain Ali ki taraf dekha aur un se mukhaatib hokar faarsi me farmaaya ‘Maulana saahab! Auliya Allāh sab kuchh jaante hain magar unhe wo zaahir karne ki ijaazat nahi hoti.’

(2) Ek martaba Aap ne apni jeb se 1000 rupye ke sikke nikaale aur apne khaadim Noor Aalam Khan ko Langar ke bhed kharidne ke liye diye. Noor Aalam Khan ko ta’ajjub hua ke Hazrat har baar khaanqaah ki zaroorat ke liye itne saare rupye apni jeb se kaise nikaalte hain jab ke koi zaahiri aamdaani ka zariya nazar nahi aata hai aur rupye khatm bhi nahi hote.
Aap un ke dil ka ye khayaal jaan gaye aur farmaaya ‘Faqeer ki jeb Afghani thaili hai aur kam se kam meri zindagi bhar khaali nahi hogi.’

****************
Aap Hazrat Khwaja Dost Muhammad Kandahari rahmatullāhi alaihi ke mureed aur khalifa hain.
Aur ‘Naqshbandi Mujaddidi’ silsila ke Shaikh hain.
Hazrat ne Aap ko Qaadri, Chishti, Suharwardi, Kubrawiya, Madaari, Qalandari, aur Shattaari silsile ki bhi khilafaat wa ijaazat ata framai hai.

Aap ke khulfa :

(1) (Aap ke saahbzaade) Hazrat Khwaja Shaikh Muhammad Siraaj-ud-deen Naqshbandi
(2) Hazrat Maulana Sayyed La’al Shaah Hamadani Bilawali
(3) Hazrat Maulana Mahmood Shirazi
(4) Hazrat Shaikh Faazil Awaan
(5) Hazrat Maulana Noor Khan Awaan Chakralwi
(6) Hazrat Maulana Muhammad Rasool Laoon Khurasani
(7) Hazrat Maulana Beg Muhammad Khurasani
(8) Hazrat Haafiz Sayyed Ahmad Ali Dehlawi
(9) Hazrat Maulana Sayyed Akbar Ali Dehlawi
(10) Hazrat Maulana Muhammad Haashim Bagharwi
(11) Hazrat Khwaja Maira Qalandar
(12) Hazrat Sayyed Ameer Shaah Hamadani Bilawali
(13) Hazrat Sayyed Muhammad Shaah Hamadani Bilawali
(14) Hazrat Maulana Husain Ali
(15) Hazrat Qaazi Abdur Rasool Angwi
(16) Hazrat Maulana Mahar Muhammad Awaan Angwi
(17) Hazrat Maulana Ghulaam Husain Pongar.

****************
Aap ka wisaal 22 Sha’abaan 1314 Hijri (26 January 1897 A.D.) ko hua.

Apne wisaal se pehle aap ne Kalma e Tayyaba ka wird shuru kiya aur inteqaal ke waqt tak aap ki zabaan par kalma jaari tha.

Aap ki namaaz e janaaza aap ke saahabzaade Hazrat Khwaja Muhammad Siraaj-ud-deen Naqshbandi rahmatullāhi alaihi ne padhai.

Aap ka mazaar Moosā Zai Shareef, Dera Ismāeel Khan (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Uṡmaan Damani rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.