Hazrat Imaam Abul Laiṡ, Nasr Samarqandi rahmatullāhi alaihi :

51611137_1511555778978941_8538678993455415296_n
Alqaab :
‾‾‾‾‾‾‾‾‾‾
Faqeeh-e- Hanafi, Imaam-ul-Huda.

*****************
Aap ki wilaadat 332 Hijri (944 A.D.) me Samarqand (Uzbekistan) me hui.

Aap ke waalid ka naam Hazrat Mohammad bin Ibrāheem al-Tawzi rahmatullāhi alaihi hai.
Aap ke waalid azeem faqeeh the.

*****************
Aap ne apne waalid se Hadeeṡ ki, aur Balkh me Hazrat Faqeeh Abu Ja’afar Mohammad bin Abdullāh Hindavani aur Hazrat Qaazi Abu Saeed Khaleel bin Ahmad Sejzi se Fiq’h aur Mufaseer wa Muhaqeeq Hazrat Mohammad bin Fazl Balkhi se Tafseer ki ta’aleem haasil ki.

Aap Qur’an, Hadeeṡ, Fiq’h, Tafseer, aur Kalaam ke maahir the.
Aap Imaam-ul-Kabeer, Faqeeh-e-Aazam, Muhaddeeṡ-e-Jaleel, Mufassir-e-Kabeer, aur Faazil-e-Benazeer the.
Ahaadeeṡ ki bahot saari kitaaben Aap ko hifz thi.

****************
Aap Hanafi fiq’h ke maahir the. Aur logo ko Fatawa diya karte the.

****************
Tasannif :
‾‾‾‾‾‾‾‾‾‾‾‾‾
Aap ki lkhi hui mash’hoor kitaaben :
(1) Bahr-ul-Uloom (Tafseer-e-Samarqandi) [Tafseer-e-Qur’an majeed, 4 Jild)
(2) Tanbeeh-ul-Ghaafileen
(3) Khazaanat-ul-Fiq’h
(4) Navaadir-ul-Fiq’h
(5) Aqeedat-ul-Usool
(6) Mukhtalif Fataawa
(7) Risaala Muqaddama fil Salaat
(8) Bustaan-ul-Aarifeen
(9) Sharhe Jaami.

***************
Aap behad muttaqi aur zaahid the.

Aap ka Qaul hai ke ‘Qayaamat ke din mere Aamaal Naame me se fuzool (bekaar) ki koi cheez na niklegi aur maine jab se daayen haath ko baayen se pehchaana hai (ya’ani hosh sambhala he) tab se Jhut nahi bola aur na kisi ke saath Buraai ka is qadr bhi iraada kiya ke jis qadr jaanwar apne sar ko paani me maarta hai aur phir utha leta hai.’

****************
Ek martaba Aap tijaarat ki garz se safar par rawaana hue. Raaste me daakuo ne Aap ke qaafle ko loot liya. Daakuo ne jab loote hue saamaan ko kholna shuru kiya to us me se kai thelo me sirf dhele (Paththar ke chhote tukde) bhare hue the.
Daakuo ko is baat par badi hairat hui. Unho ne is ke baare me Qaafle waalo se puchha. Qaafle waalo ne kaha ke “Abul Laiṡ se puchho kyun ki ye dhele unho ne hi laade the.”
Jab Daakuo ne Aap se puchha to Aap ne farmaaya ke “Ye dhele hum ne Istinja ke liye apni khud ki zaati zameen se liye hain taaki ghair ki zameen se istinje ke dhele uthaane ki naubat na aaye.”
Daakuo ko yeh baat sunkar bada khauf paida hua aur un sab ne taa’ib hokar qaafle waalo ka maal waapas kar diya.

********************
Qaul :
‾‾‾‾‾‾‾‾
Aap farmaate hain :
3 Aadamiyon ki Dua qubool nahi hoti :
[1] Jo Maale Haraam Khata ho.
[2] Jo kaṡrat Gheebat karta ho.
[3] Jo musalmano se Hasad rakhta ho.

****************
Aap ka wisaal 11 Jamaadi uṡ ṡaani 373 Hijri (18 November 983 A.D.) ko Mangal ke roz 41 baras ki umr me hua.

Aap ka mazaar Balkh (Afghanistan) me hai.

****************
Samarqand ke logo ne Aap ki wafaat ke afsos me ek mahine tak apni dukaane na kholi aur un ka iraada tha ke aur ek mahina na kholenge magar Haakim ne un ko samjha kar khulva di.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Imaam Abul Laiṡ, Nasr Samarqandi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.